Kmukum 6 - Udél Dwata: Gna Kesfasad ne Lomi Kesfasad

Gidyun

¹ Timbow bud nmò yó kem tau Israél yóm kenbê Dwata yóm sana kul Dwata hol gónó mogot, yó gónó Dwata hemlus kul elem hólól yó kem tau Midyan. Botong hitu halay le kegen le nô lem hólól le

² ne ya tey kehsidek kem tau Midyan kul. Lemwót yó kem tau Israél, gotu le mlóy elem bulul ne hebnos le gu lem yó kem kilib bè yó ne heklung le bè yó kem botu lembang.

³ Ket kmò le hulu yó kem tau Israél kulel gel kundug le kul yó kem tau Midyan, mung kul yó kem tau Amélék ne yó kem dumu tau gel nô bè yóm benwu laen hol wen tauhen fi dmata kdaw Él Jurdan.

⁴ Mom bè yó gónó le kmamfù yóm kdê le bè yóm tonok gónó le gel mò hulu yó kem tau Israél ne gotu hensidek le yóm klamang hulu le efet kól ditu bè Gasa yóm benwu hol fi leged. Gotu nwa le bè yó kem tau Israél yóm kdê ubiha ne safì ne kudà asnu le. Balù udì ke wen tebel bélê le mò lowil le.

⁵ Bè yóm ksut le, gotu nwit le yó kem ógóf le ne yó kem kamfù le. Ya tey kwen le lómón ksut tlangas. Yó kem kamél gel snakay le, là kô gbekem msó kul. Ngang le nô bè yó efet gotu mekfung hulu yó kem tau Israél.

⁶ Tey sidek kélél le yó kem tau Israél.

⁷ Omin le yó he bud hkodu bè Dwata yó kem tau Israél anì tnóbóngen lu bè yó kem tau Midyan.

⁸ Yó nmò Dwata, wen tugoden hwiten elem blóng le. Yó udél yóm tugoden, monen, “Ni se udél Dwata ebélê ye, yóm sana kuy Dwata hol gónó mogot kem tau Israél, ‘Deng hewau yu bè yóm keghesek ye bè Idyip

⁹ ne deng hewau yu lem tdok yó kem tau Idyip. Ne deng bud hewau yu bè yó kem tau gel gmida kuy bè ni bè Kanan. Bè yóm khusek ye elem benwu le gotu lohu lu ne blayu kuy yóm tonok le.

¹⁰ Deng tehe tulónu kuy ou se yóm sana kuy Dwata hol gónó mogot. Hol bê ye abay tmaba ebè yó kem kul dwata kéng yó kem tau Amurayt, yó kem tau tehe menwu ta nim tonok gónó ye nô ni. Okóm là kô hnungol ye do.’ ” Yó se udélen ebélê le yóm tugod Dwata.

¹¹ Sotu kdaw bè yó, wen hógów Dwata gu bè longit sut bè yóm benwu boluyen Ufra, myón laan yóm koyu boluyen ok nfun Juas yóm tau lemwót bè tbong yóm tehe Abisér. Nim Juas ni, wen ngaen logi boluyen Gidyun tolo hebnos kmusu bè yóm gónó le gel kemmes él grép anì là ton le du yó kem tau Midyan yóm kkusuhen.

¹² Bè yó bè gónón kmusu gónón hegfan béléen yóm hógów Dwata yó koni ne tódô monen mò du, “Ó tau lóbô hulung gmida, tendo nô béléem Dwata.”

¹³ Yó mon Gidyun mò du, “Ó Sér, ke nô bélê me se Dwata, moen du ke lómón ni gfà me? Nô se yó du kem hentaw ton tehe tulón le kum yó kem tehe fù me, yóm tehe nmò Dwata bélê le bè yóm tehe kwiten kul hewà gu bè Idyip? Okóm deng tódô bayà Dwata mi. Deng lusen mi elem hólól yó kem tau Midyan.”

¹⁴ Omin Dwata mdók ke Gidyun, monen mò du, “Lemwóti ne, hotuhem gelem anì hewaem lu lem hólól yó kem tau Midyan yó kem tau Israél. Ou se nim hol mdók kóm ni.”

¹⁵ Bnalà Gidyun se, monen, “Okóm, Dwata, tedu se tô kmò kehewau kul du yó kem tau Israél? Blaem yóm dou tbong hono kem tau lunog bè ból Manasi. Ne ou se yóm alì glaan bè kdê yó kem fes lówó me.”

¹⁶ Bnalà Dwata se, monen, “Kaem gbekem hewà kul abay se ou tmóbóng kóm. Yóm klahilem gemlà kul hol lómón ke tek sotu tau gnidahem.”

¹⁷ Bnalà Gidyun se, monen, “Ke tahu yóm któbóngem do, moi do ilô kun mò gónóhu temngón du ke tahu uu yóm sana kum Dwata yóm mudél ebéléu ni.

¹⁸ Hol béi tagad mulék nahem nangat ou, wen blayu kóm.” Mon Dwata se, “Yó sen, nahu na nangat uu.”

¹⁹ Tahu se, kendel mulék ebè gónóen Gidyun, ominen tmétê sotu ngà kambing ne wen dô sfolò kilu arina nmoen mambang, yóm mambang laen dù bulung henoken. Lemwót yóm utón tnógóhen suen lem abì ne fen suen lem kuleng yóm sóbówen. Ominen mit du ebè yóm hógów Dwata myón laan koyu ok.

²⁰ Yó monen mò du yóm hógów Dwata, “Suem ta nim botu nii yóm utón ne yóm mambang nwitem, kokem etahen yóm sóbów.” Tahu se, nmò Gidyun yóm hmoen du yó.

²¹ Omin yóm hógów Dwata mdù du bè yóm utón yó ne yóm mambang yóm tukô tugeden. Tódô sen-gengen se yóm tey dilóf ofi hesut gu lem yóm botu yó, gotu mkekeb yóm utón ne yóm mambang. Ne sen-gengen se tódô lana yóm hógów Dwata yó koni.

²² Yó he ketngón Gidyun du hógów Dwata gu bè longit yóm tonen, ya tey sidek klikoen. Yó udélen, monen, “Ó Dwata yóm hol dandónen geta, deng tonu yóm hógówem gu bè longit, deng me tódô suyó.”

²³ Okóm yó mon Dwata mò du, “Béi abay hlikò, henekem nawahem, là kói matay he.”

²⁴ Omin Gidyun semsodò botu bè yó mò gónóhen demsù ebè Dwata ne yó boluyen du, “Lemwót bè Dwata yóm kenek nawa.” Efet ni kmoen ni sana knóen bè yó bè Ufra yóm gónô demsù yó, nfun yó kem kun ból Abisér.

²⁵ Bè yóm kifu yó, yó bud mon Dwata mò ke Gidyun, “Nwahem yóm gewu safì tudu maem deng hitu halayen. Genbaem yóm gónó maem gel demsù ebè Baal ne nofokem yóm hehek ilô yóm dwata libun boluyen Asira mdà klohoken.

²⁶ Tles hdaem bè yó ta yóm bulul udì yóm gónô demsù ebè Dwata, yóm sana kóm Dwata hol gónó mogot. Hninggelem semsodò kul yó kem botuhen. Ominem demsù du tahen yóm safì tudu deng nwahem, hkekebem. Snukem du yóm hehek Asira deng nofokem.”

²⁷ Tahu se, lemwót Gidyun, nwiten yóm sfolò kem tau tóbóng lówóhen nmoen yóm dók Dwata du. Okóm yóm kmoen du, nmoen kifu abay se tey sidek klikoen yó kem fes lówóhen ne yó kem dumu tau bè benwuhen.

²⁸ Timbow le temkifu btik hlafus yó kem tau bè yóm benwu yó, tódô ton le deng wen gembà du yóm gónó le gel demsù ebè Baal ne deng nofok le yóm hehek Asira, yóm dwata libun le. Bud ton le snéen yóm dù tebel bè yóm safì tudu deng hkekeb le ta yóm gónô demsù lomi mdà bè yó.

²⁹ Gotu le sesólók yóm kdê le, mon le, “Tau du se mò du nim ni?” Tey kehtukul le du ne tngón le Gidyun mò du yóm yó yóm ngà Juas logi.

³⁰ Ne yó mon le mò ke Juas, “Hewaem ebélê me dini yóm ngaem ne me e hnatay. Deng genbaen yóm gónô demsù ebè Baal ne deng nofoken yóm hehek Asira yóm dwata libun.”

³¹ Okóm mom yó udél Juas ebè yó kem tau mógów ebéléen, monen, “Nfi ye Baal kô kuy? Nofin ye kô? Ke wen tau mofin du, là kóen gefet haya yóm tau yó. Ke tahu dwata se nim Baal ni, kaem nofinen kun knô. Igoen kun gónô demsù yóm deng genbà le.”

³² Lenwóten bè yó ne, yó hlós taba le ke Gidyun, Jirub-baal, lemwót bè yóm kmon maen du, “Tódô nofin Baal yóm kun knô igoen kun gónô demsù yóm deng genbà le.”

³³ Là legenen bè yó, gotu le stifun yó kem kdéen tau Midyan ne yó kem tau Amélék ne yó kem dumu tau nô bè yóm benwu laen hol wen tauhen fi dmata kdaw Él Jurdan, omin le mifal yóm Él Jurdan na le e kmamfù bè Datal Jisriil.

³⁴ Okóm ke Gidyun, tódô sut béléen yóm Tulus Dwata ne yó nmoen, mféw mò tabahen yó kem logi lemwót bè ból Abisér mò mung du.

³⁵ Wen se kem tau hógówen ebè klamang gónó le nô yó kem sfu Manasi, htabahen lu mò mung du. Bud wen se kem tau hógówen ebè yó kem sfu Asér ne sfu Sibulun ne sfu Naftali ne gotu le msut, mung le du.

³⁶ Omin Gidyun mon du mò ke Dwata, “Ke tahu ou se yóm hógówem mò lemwà yó kem tau Israél

³⁷ moi do ilô. Ni wen bul ubiha suu bè ni ta tonok bè gónó me gel kmusu. Hlafus haya, ke hono amù nim bul ubiha ni ne fen là yóm tonok gónón masà, bè yó ne gónów temngón du deng uu yóm hógów do ni mò lemwà yó kem tau Israél.”

³⁸ Tahu se, tikóng hayahen bè yó btik Gidyun ne tenngelen yóm bul ubiha, hol kéng duem du yóm deng monen. Kenmesen yóm bul ubiha ya tey amù temdak gu du, botong tô hnok tukung.

³⁹ Yó bud mon Gidyun mò ke Dwata, “Béem lenbut ou, Dwata, sotu duen yóm bud hnihu béléem. Ke yó dum hyu béléem, budi mò do ilô mlan bè nim bul ubiha nii. Hol hékéngem nim bul ubiha nii ne fen héfê amù yóm tonok hilol yóm gónón masà.”

⁴⁰ Tahu se, bè yóm kifu yó tódô uliten du yóm nmò Dwata. Bè yóm kehlafusen, mékéng yóm bul ubiha ne fen héfê amù yóm tonok hilol yóm gónón masà.