Kmukum 4 - Udél Dwata: Gna Kesfasad ne Lomi Kesfasad

Dibura ne Barak

^1-2 Kogol katay yóm sotu tau boluyen Ihud, deng bud nmò yó kem tau Israél yóm kenbê Dwata yóm sana kul Dwata hol gónó mogot. Yó gónó Dwata hemlus kul elem hólól Jabin bè syudad Hasor yóm tau hol geta bè yó kem tau Kanan. Yó boluy yóm kmandér bè yó kem sendaluen duhen Sisira tau menwu bè Harusét, yóm sotu syudad yó kem tau Kanan.

³ Nim Sisira ni, wen syóm latu klitun bala tók gel niten bè gida ne botong lewu folò halayen kegenen alì hemsidek hmayam kul yó kem tau Israél. Omin le yó he bud hkodu bè Dwata yó kem tau Israél anì tnóbóngen lu.

⁴ Wen sotu libun tugod Dwata boluyen Dibura yehen Lapidot. Bè yóm kdaw yó, du sotu gel kmukum bè yó kem tau Israél.

⁵ Yó gónón gel myón kmukum laan yóm sotu lefò gel mon le Lefò Dibura, nô bè blóng le benwu Rama ne yóm benwu Bétél bè yó kem bulul lemnek bè tonok Ifraim. Ne gel le mógów ebéléen yó kem tau Israél anì na le e hkukum du.

⁶ Sotu kdaw hangayen Barak yóm ngà Abinuam menwu bè syudad Kédés bè tonok Naftali. Yó monen mò du, “Ni se udél hwiten ebéléem yóm sana Dwata hol gónó tekuy mogot kem tau Israél, ‘Semtifuni ditu bè Bulul Tabur sfolò libu tau hulung mit sgida lemwót bè ból Naftali ne bè ból Sibulun.

⁷ Lemwót dou,’ mon Dwata, ‘nwitu Sisira, yóm kmandér bè yó kem sendalù Jabin mò mit kuy sgida bè yó bè Él Kisun. Gotu nwiten yóm kdê klitun tóken ne yóm kdê sendaluen, okóm hegmou yu béléen.’ Ni se yóm udél hwit Dwata ebéléem.”

⁸ Yó mon Barak mò ke Dibura, “Són gónóhu mógów ke mungi do. Okóm ke là mungi do bée.”

⁹ “Yó ne,” mon Dibura, “munge kóm. Okóm ke deng tekuy gemmò là gboluyi du kóm, abay se angat blay Dwata Sisira elem hólól yóm sotu libun.” Tahu se, mung ke Barak Dibura etu bè Kédés.

¹⁰ Bè yóm kkól le bè Kédés, gotu htaba Barak yó kem ból Sibulun ne ból Naftali ne botong sfolò libu kwen kem sendalù mung du. Mung du snéen Dibura.

¹¹ Bè yóm kdaw yó, lemwót Hébér yóm sotu tau Kinayt semfu gu bè yóm tehe fóg Musis boluyen Hubab, deng hetlas gu bè yó kem dumuhen, deng nilihen yóm gónóhen kmamfù etu klohok yóm koyu ok bè Sananim moni bè Kédés.

¹² Timbow tngón Sisira yóm deng knô Barak ditu ta Bulul Tabur,

¹³ gotu sentifunen yóm syóm latu kem klitun tóken ne kdê yó kem sendaluen ne hewóten lu bè yó bè Harusét yóm sotu syudad yó kem tau Kanan, hógówen lu etu bè Él Kisun.

¹⁴ Yó udél Dibura ebè Barak, monen, “Lemwóti ne. Deng eles tukô gna kóm yóm sana Dwata hol gónó tekuy mogot. Kemdaw ni hegmoen uu bè Sisira.” Tahu se, mosol gu ta Bulul Tabur Barak ebè yóm gónó le sfatay, mung du yóm sfolò libu kem sendaluen.

¹⁵ Tikóng le mundug le Barak, ya tey kehlangaf Dwata ke Sisira dalang se yó kem sendalù mit klitunen ne yó kem dumu sendaluen. Tódô kmó ta klitunen Sisira ne lemwót mlóy.

¹⁶ Gotu ktes Barak yó kem kudà Sisira mit klitun ne yó kem sendaluen etu bè Harusét, yóm syudad gónó le nô yó kem tau Kanan. Tódô kdê yó kem sendalù Sisira gotu hnatay le lu. Balù sotu ke wen mowil bélê le.

Là bud kwit le sfatay bè yó kem tau Israél yó kem tau Kanan

¹⁷ Okóm ke Sisira kun, fen mlóy etu bè tolda Jail yóm libun yehen yóm tau Kinayt boluyen Hébér, abay se yó kem fes lówó Hébér swè le Jabin yóm tau hol geta bè benwu Hasor.

¹⁸ Bè yóm kton Jail ke Sisira senlongen ne monen mò du, “Huseki elem toldahu, Sér. Huseki elemen, béi abay hlikò.” Tahu se, husek elemen Sisira, tódô masà. Omin Jail lemimun du.

¹⁹ Omin Sisira mni él, “Yake hinumem o dé, denge tey meeng.” Tahu se benlay Jail bede gatas, ominen bud lemimun du.

²⁰ Yó bud mon Sisira mò du, “Mdai kut bè yó bè bak dólem. Ke wen tau sut ne snólóken ke deng wen tau kól bè ni, monem laen duen.”

²¹ Okóm tikóng deng gtungô Sisira lemwót bè yóm tey klitegen, yó nmò Jail ma bakbak ne nwahen yóm hteg toldahen, ominen hganag mógów ebè Sisira, tódô heseken bè langihen botong mahul ebè tonok ne matay.

²² Timbow msut Barak nan e nebel Sisira, senlong Jail ne monen mò du, “Hlósi, toloku kóm yóm tau hnebelem.” Tahu se, mung du husek Barak ne tódô tonen Sisira masà bè tonok deng matay, gtool bè langihen yóm hteg tolda.

²³ Bè yóm kdaw yó, deng hegmò Dwata lu bè Jabin yóm tau hol geta bè Kanan yó kem tau Israél.

²⁴ Lenwóten bè yóm kdaw yó, sónmoen temnù gel yó kem tau Israél senta Jabin, ngangen efet ghatay le.