Kmukum 2 - Udél Dwata: Gna Kesfasad ne Lomi Kesfasad

Yóm tulón yóm hógów Dwata gu bè longit bè yó kem tau Israél

¹ Wen hógów Dwata gu bè longit lemwót bè Gilgal mógów etu bè Bukim. Yóm kkólen ditu, yó udélen ebè yó kem tau Israél, monen, “Deng hewau yu gu bè Idyip ne nwitu yu ebè nim tonok tehe fasadu yó kem tehe fù ye. Deng monu mò kuy là gbeku du ke là dnohou du yóm deng senfasad tekuy ditu bè Bulul Sinay.Ne yó deng kuy fasad do, béen wen senfasad ye bè yó kem tau menwu bè ni. Deng tehe dóku kuy hol genbà ye yó kem gónó le gel demsù ebè yó kem kul dwata lennged. Okóm là kô nimón ye du yóm deng hmou kuy yó.

² Ne yó deng kuy fasad do, béen wen senfasad ye bè yó kem tau menwu bè ni. Deng tehe dóku kuy hol genbà ye yó kem gónó le gel demsù ebè yó kem kul dwata lennged. Okóm là kô nimón ye du yóm deng hmou kuy yó.

³ Ngem, lemwót bè yóm là kimón ye yó, là hdóhu kul ta nim tonok ni yó kem tau menwu tahen. Baling hohon ye lu. Ne yóm knô ye lem blóng le, hol lómón kegnóm ye du ke nô ye lem sual ne angat yó se gónó ye gholot bè yó kem kul dwata.”

⁴ Timbow deng kudél yóm hógów Dwata yó koni, ya tey kedlumu le mkik yó kem tau Israél.

⁵ Ne yó gónó le moluy du Bukim yóm benwu yó. Ne wen dsù le ebè Dwata bè yó yóm sana kul Dwata hol gónó mogot.

Katay Juswa

⁶ Omin Juswa gotu hewót kul yó kem tau Israél anì ket sotu kun ma yóm kun ólól bè yóm tonok yó.

⁷ Bè yóm tolo klowil Juswa, tey klolò kem tau Israél du yóm sana kul Dwata ne senged se bè yóm deng katay Juswa, tódô seflós klolò le ke Dwata bè yóm igò le tolo mowil yó kem tau gónó le gel galak, kem tau deng tehe mton du yóm kdê deng nmò Dwata bè Israél.

⁸ Bè yóm katay Juswa yóm tóbóng lówó Dwata ngà Nun, deng lematu sfolò ne halayen.

⁹ Lebeng le bè yóm kun tonok bè Timnat Sira bè yó kem bulul lemnek bè tonok Ifraim senbwak Bulul Gaas.

¹⁰ Timbow le deng gotu matay se kul yó kem tau Israél tolo mowil bè yóm kdaw yó, lemwót yó kem lugod le tmodol huli kul, deng mom knogol le yóm sana kul Dwata hol gónó mogot, klifót le yóm deng tehe nmoen bè yó kem tau Israél.

Là bud ktaba kem tau Israél ebè Dwata

¹¹ Ngangen ne yó kem tau Israél deng mom nmò le yóm kenbê Dwata yóm sana kul Dwata, deng le mom tmaba ebè yó kem lennged yóm dwata kéng boluyen Baal.Là bud le tmaba ebè Dwata yóm sana kul Dwata hol gónó mogot yó kem tehe fù le, yóm Dwata tehe mit kul hewà gu bè Idyip. Deng le mom tmaba ebè yó kem dumu dwata kéng yó kem tau hmilol kul ne mtud le bukol bè solu le. Tey kehefebut le du yóm sana kul Dwata hol gónó mogot.

¹² Là bud le tmaba ebè Dwata yóm sana kul Dwata hol gónó mogot yó kem tehe fù le, yóm Dwata tehe mit kul hewà gu bè Idyip. Deng le mom tmaba ebè yó kem dumu dwata kéng yó kem tau hmilol kul ne mtud le bukol bè solu le. Tey kehefebut le du yóm sana kul Dwata hol gónó mogot.

¹³ Là bud le tmaba ebéléen, deng le mom tmaba ebè Baal ne bè yó kem lennged yóm dwata libun boluyen Astartis.

¹⁴ Yó se gónón alì sidek kebuten kul yóm sana kul Dwata yó kem tau Israél. Yó nmoen bélê le, lusen eta le yó kem tau gel muluk mò muku yóm kdê nfun le. Blayen lu elem tdok yó kem hohon le hmilol kul ne là kô wen gmò le.

¹⁵ Ket kesgida le bè yó kem hohon le, deng mom Dwata mit kul sgida, là kô hegmoen kul lómón yóm deng tehe monen mò kul ke là mimón le. Ya tey sidek keglayam le.

¹⁶ Ominen yó wen bélê le nélék Dwata mò fen malak kul anì gewà le lem tdok yó kem tau gel mundug kul.

¹⁷ Okóm yó kem tau Israél, là kô le dog hmungol bè yó kem tau tô malak kul. Deng le mom tmaba ebè yó kem dumu dwata ne mtud le bukol bè solu le. Yó kem tehe fù le, tey kimón le du yó kem hlolò Dwata kul. Okóm ni kem lomi ból Israél ni, tódô kendel knogol le Dwata, là kô le mimón.

¹⁸ Ke gel wen tau kmukum sù Dwata lem blóng le, tendo eles nô béléen Dwata yóm tau yó, ne klawihen mowil sal gel lenwà Dwata yó kem tau Israél lem tdok yó kem hohon le. Yakà tey kkodu Dwata kul yó kem tauhen bè yóm tey kehegnok le kul yó kem hohon le ne bè yóm tey kehlayam le kul.

¹⁹ Okóm ke deng matay yóm tau malak kul yó, bud senfulék yó kem tau Israél yóm sana kul lan ne mom milud he ksideken yóm kul nmò senta yóm kul ksidek nmò yó kem tau gna bélê le. Mom yó lolò le yó kem dumu dwata lennged ne tmaba le ebélê le ne mtud le bukol bè solu le. Là móyô le mkó du yóm sidek gel nmò le ne yóm alì kgel kulu le.

²⁰ Duhen yó, tey sidek kebut Dwata kul yó kem tau Israél ne yó udélen, monen, “Lemwót bè yóm deng kegbà le du yóm deng tehe senfasad me yó kem tehe fù le ni kem tau ni ne deng knogol le yó kem dou hlolò kul,

²¹ là kô naw e hdó kul ta nim tonok ni yó kem dù hohon le, yó kem tau là deng hdó Juswa du gu laanen là deng matay.

²² Yó muhu du ni kem dù tau tebel ni mò gónóhu tmilów yó kem tau Israél ke tahu nimón le ou lómón yóm tehe kimón yó kem tehe fù le ekni.” Yó se udél yóm sana kul Dwata yó kem tau Israél.

²³ Yó gónóm mon, là gotu lo Dwata kul yó kem tau nô ta yóm tonok Kanan. Bè yóm kun kdaw Juswa, là sulék blay Dwata du elem hólólen yóm kdê le ne là kendel hdóhen kul kogol yóm katayen. Là gomongen bè nili yóm tsaptér 3. Yó tulónen yóm tlu kem tau nélék Dwata mò tmóbóng yó kem tau Israél anì gemmò le bè yó kem hohon le. Yó boluy le, Utniél, Ihud ne Samgar.