Kmukum 16 - Udél Dwata: Gna Kesfasad ne Lomi Kesfasad

Kógów Samsun ebè Gasa

¹ Sotu kdaw, lemwót Samsun mógów ebè yóm sotu syudad yó kem Flistin boluyen Gasa. Bè yó gónón mton du yóm sotu libun hdóyón ne sentungóen.

² Timbow tngón yó kem tau bè Gasa yóm knô Samsun bè yó, yó nmò le gotu senibut le yóm benwu yó. Tódô suloy le buteng mangat du bè bak tikeben. Balù udì ke mudél le, yó hendem le, “Nangat tekuy efet kól hlafus, omin tekuy hmatay du.”

³ Okóm ke Samsun kun, mom btik sóól buteng. Bè yóm kewóten tódô nogoten yóm bak tikeb deng tnikeb le ne tódô kenduten yó kem heheken. Ominen gotu tmihang du mayuk yóm kdéen etu ta yóm bulul fi fatu Hibron.

Kton Samsun ke Dilayla

⁴ Kogolen bè yó, wen sotu libun Flistin bud niwol Samsun boluyen Dilayla, menwu bè Datal Surék.

⁵ Yó nmò yó kem tau malak bè yó kem Flistin mógów le ebè Dilayla, mon le mò du, “Snukatem Samsun anì tulónen kóm yóm gónón lemwót kgisen ne ke tedu nmò me anì gemmò me béléen, anì gfét me ne anì laen dù bud gmoen. Ke tulónem kum, sket benlay me u lemibu bud lematu botù blówón bukay.”

⁶ Tahu se, stulón ke Samsun Dilayla, monen mò du, “Hol tulónem dou sen gónón lemwót yóm kgisem ne tedu nmò le béléem anì gfét le uu.”

⁷ Bnalà Samsun se, monen “Ke wen mfét dou hitu dolol yóm fét boho hanà lomi tódô monol yóm kgisu, lómón kgis dumu tau.”

⁸ Tahu se, wen nwit le ebè Dilayla hitu dolol yóm fét boho hanà lomi yó kem tau malak bè yó kem Flistin, omin Dilayla mfét ke Samsun.

⁹ Bede deng eles wen yó kem tau Flistin deng bnos Dilayla bè yóm sotu dfél bè gónóen. Timbow deng kféten du, ominen lemangat, monen, “Ó Samsun, btiki. Ni kem Flistin deng le kól bè ni.” Tahu se, hboluk btik Samsun ne tódô gotu hto yóm hitu dolol fét boho hanà lomi, hol lómón ke hentohem ofi yóm balu tnikel. Ne là kô tngón le du gónón gu lemwót yóm kgis Samsun yó.

¹⁰ Yó bud mon Dilayla mò ke Samsun, “Tey kóem nmoem béléu ni du, hnowonem ou. Là kô tulónem du do yóm ktahuhen. Hol tulónem do dé ke tedu nmò le béléem anì gfét le uu.”

¹¹ Mon Samsun se, “Ke nfét le o tébéd hanà lomi, yóm là deng wen mfét du tódô monol yóm kgisu, lómón kgis yó kem dumu tau.”

¹² Tahu se, wen fét hanà lomi nwa Dilayla ne féten ke Samsun. Ominen lemangat, monen, “Ó Samsun, btiki. Ni kem Flistin deng le kól bè ni.” Uma kóm deng eles wen kem Flistin hebnos bè dumu dfél. Okóm tódô hento Samsun yóm féten yó, hol lómón ke sbalu tnikel kegnómen du.

¹³ Yó bud mon Dilayla mò ke Samsun, “Tey kehlowonem do, là kô tulónem du do yóm ktahuhen. Tulónem do sen ke tedu nmò le béléem anì gfét le uu.” Mon Samsun se, “Ke mung ewelem bè yóm newelem yóm hitu slofil weku, ominem hemget du tódô monol yóm kgisu, lómón kgis yó kem dumu tau.”

¹⁴ Bè yóm igoen tungô Samsun, lemwót Dilayla tódô mung ewelen yóm hitu slofil wek Samsun bè yóm newelen, ominen hemget du. Timbow deng kehgeten du ominen lemangat, monen, “Ó Samsun, btiki. Ni kem Flistin deng le kól bè ni.” Bè yóm bud kebtik Samsun, tódô ktengen yóm weken ne tódô mlus bè yóm newelen.

¹⁵ Bud mon Dilayla mò du, “Igoem sem mon du mò do du bong nawahem do, moen du ke tolo wen bunihem béléu? Deng tlu dulékem ni ne hmowon dou. Là kô tulónem du dou yóm gónón lemwót kgisem.”

¹⁶ Tódô ket kdaw Dilayla mubug ke Samsun, là kóen tmakas. Efet tódô tmakas Samsun là bud gbalahen du yóm tendo kubug Dilayla du.

¹⁷ Efet tódô tulónen du yóm ktahuhen, monen, “Lemwót bè yóm tehe ksutu efet nim kmoen ni là kô deng wen kemleng du he nim weku, abay se deng hetfing le o ebè Dwata mò tau Nasarit. Ke kenleng le nim weku ni tódô monol yóm kgisu, lómón kgis yó kem dumu tau.”

¹⁸ Timbow glileb Dilayla yóm deng ktulón Samsun du yóm ktahuhen, ominen kendel hemwit tulón ebè yó kem tau malak bè yó kem Flistin, monen, “Bud ye mógów sulék edini. Deng gotu tulónen do yóm ktahuhen.” Tahu se, bud le semfulék eles nwit le yóm filak tehe fasad le du.

¹⁹ Omin Dilayla htungô ke Samsun ta hahahen. Tikóng deng gtungô, ominen htaba yóm tau hulung gmunting mò gmunting yóm hitu dolol slofil weken anì gekfô le. Timbow deng kguntingen du, tódô monol ne kgis Samsun.

²⁰ Omin Dilayla lemangat, monen, “Ó Samsun, btiki. Ni kem tau Flistin deng le kól bè ni.” Omin Samsun btik, ofo kun hemdem du ke sana kmoen du yóm tehe gel nmoen anì gewà bélê le. Okóm là kô tngónen du yóm deng ktagak Dwata du.

²¹ Omin le kemfô du yó kem Flistin ne lensit le matahen. Nwit le ebè Gasa, nfét le yóm tey kdina mgemel ne ditu lem gónô blanggù senflós le hgaling du silà.

²² Okóm ninuten se lemnok yóm weken.

Katay Samsun

²³ Timbow deng legen udì bè yó, sotu kdaw gotu le stifun yó kem tau malak yó kem tau Flistin, hligal le mò ken bong ne wen tey dsù le ebè yóm kul dwata lennged boluyen Dagun. Yó mon le, “Deng hegmoen tekuy yóm kut dwata bè Samsun yóm tau hohon tekuy.”

^24-25 Tey kehligal le, mon le, “Yake htaba tekuy Samsun mò lelen senflowon tekuy.” Tahu se. Timbow hangay le Samsun gu lem gónô blanggù tey keseflowon le du, hyu hdà le bè gónón sóól yóm lewu hehek lembang yóm gónô bong gónó le stifun yó. Timbow ton yó kem tau Samsun tey kdóyón le yóm kul dwata kéng, mon le, “Deng hegmoen tu yóm kut dwata bè hohon tekuy. Hegmoen tu bè yóm tau hemsidek yóm benwu tekuy ne deng tey dê ne hnatayen bélê tekuy.”

²⁶ Ne yó mon Samsun bè yóm ngà logi malak du, “Nalakem o anì nogotu yóm lewu kem hehek lembang mò gónóhu hegléd.”

²⁷ Yóm gónô bong yó, tey tau wen nô lemen kem logi ne libun. Gotu le nô bè yó se kul yó kem tau malak yó kem Flistin. Ne wen dô tlu libu kem logi ne libun nô te ketef temngel ebè Samsun ne gbót le hmowon se kul.

²⁸ Omin Samsun mni bè Dwata yóm sana kun Dwata hol gónó mogot, monen, “Ó Dwata, yóm hol dandónen geta, hentulónem o nawa nam ne bud hekgis o sulék anì gbelesu yó kem Flistin lemsit matahu.”

²⁹ Omin Samsun sbalà mogot yóm lewu kem hehek lembang sdà gónón sóól mò mtud yóm ketefen.

³⁰ Sen-gengen se mni bè Dwata, monen, “Ó Dwata, homongem o ne matay bè ni kem Flistin.” Tódô hotuhen gelen tmulud yó kem hehek lembang ne tódô tbó yóm gónô bong eta yóm limu kem tau hol geta bè yó kem Flistin ne bè kdê yó kem dumu tau nô bè yó. Tey tau wen mung matay bè Samsun senta yó kem hnatayen bè yóm hanà tolo klowilen.

³¹ Omin le mógów ebè yó yó kem dumun setwoli ne yó kem dumu fes lówóhen anì na le e nwa lówóhen. Nwit le mulék ne lebeng le bè blóng le benwu Sura yóm benwu Istaol bè yóm kilib tehe gónó le lembeng ke Manu yóm maen. Botong lewu folò halay kegen Samsun malak yó kem dumun Israél. Là gomongen bè nili yóm tsaptér 17 efet kól bè tsaptér 21. Yó tulónen bè ni kem tsaptér ni yóm tey dê gfà yó kem tau Israél lan le smonol ke Dwata. Bè gnan kdaw tehe tey kesetgel le mit sgida bè yó kem hohon le. Okóm ni, lemwót bè yóm tey ksidek nmò yó kem sfu Bindyamin, yó gónó le mit kul sfatay yó kem dumu le Israél mò hedlà le kul.