Kmukum 15 - Udél Dwata: Gna Kesfasad ne Lomi Kesfasad

Kbeles Samsun yó kem tau Flistin

¹ Deng malù legen udì bè yó geblà bè yóm kdaw muta, lemwót Samsun nauyen yehenen ne wen ngà kambing nwiten mò blayen du. Bè yóm kkólen ditu, yó monen mò ke tuónen, “Tóe mógów elem dfél yehenu.” Okóm là kô hfusek tuónen du elemen.

² Yó mon tuónen mò ke Samsun, “Ofo do ke là budi móyô ke yehenem, yó gónóhu bud hyehen du bè yóm tau dumum swè. Okóm wen twolihen mkay sentahen ktiloben ke móyói du mò tlesen.”

³ Mon Samsun, “Yó ne. Hol bê ye abay nsel ou ke wen nmou bè yó kem tau Flistin.”

⁴ Ominen lemwót bè yó, botong tlu latu bolos kenfóen. Gotu senbetengen ikong le, ket lewu kmoen du ne wen solok homong bekesen bè yóm gónón sembeteng yóm ikong le.

⁵ Ominen gotu hemtom kul ne gotu htagawen yó kem bolos yó e talak halay yó kem Flistin. Bè yóm nmoen yó, gotu mlób yó kem deng nuta le gomong yó kem là deng nuta le du he. Balù yóm gónó le gel mulu grép ne yóm gónó le gel mulu koyu ulib, gotu gomong mlób.

⁶ Snólók kem Flistin, mon le, “Tau du se mò du nim ni?” Bnalà le se, mon le, “Samsun, lan tuónen yóm tau lemwót bè Timna, bud hyehen du bè yóm hol dumun swè yóm yehenen.” Yóm kungol le du yóm yó, tódô lemwót yó kem Flistin nwa le yehen Samsun mung du maen, dnutung le lu.

⁷ Yó udél Samsun ebè yó kem tau mò du yóm yó, monen, “Lemwót bè nim deng nmò ye ni, safau là kô kóhu du nim nmou bélê ye ni efet gotu gbelesu kdéen.”

⁸ Tahu se, na a nmò Samsun hemsidek mundug kul, tey dê hnatayen bélê le. Ominen yó lemwót etu bè yóm sotu kilib bè yóm léhék boluyen Itam ne bè yó gónón nô.

⁹ Timbow kogolen bè yó, lemwót yó kem tau Flistin gotu le kmamfù bè Juda bè yóm kul benwu yó kem tau Israél na le e nundug yóm benwu Lihi.

¹⁰ Ne snólók le lu yó kem tau bè Juda, mon le, “Moen ke nundug ye mi?” Mon le se, “Nim nógów me ni na me e kenfô Samsun. Bud hulék me ebéléen yóm sidek nmoen bélê me.”

¹¹ Duhen yó, botong tlu libu kwen le yó kem tau lemwót bè Juda mógów ebè Samsun ditu bè léhék Itam ne mon le mò du, “Ilóem là tngónem du kô yóm knô tekuy lem hólól yó kem Flistin? Tedum nmoem bélê me ni du?” Mon Samsun se, “Nmou bélê le yóm deng nmò le béléu.”

¹² Bud mon le mò du, “Là óyô me du nim mógów ni na me e nfét uu, omin me meted kóm ebélê le.” Mon Samsun se mò kul, “Eles fasad ye do bê ye hnatay o.”

¹³ Mon le se, “Là hnatay me kóm, olo me mfét kóm omin me bemlay kóm ebélê le.” Tahu se, nfét le Samsun, fét le du yóm lewu tébéd hanà lomi ne nwit le gu bè yóm kilib gónón nô yó.

¹⁴ Timbow kól bè Lihi Samsun, tódô henmung senlong yó kem sendalù Flistin, ya tey kehsag le. Ominen tódô sut bè Samsun yóm Tulus Dwata, tey kehekgisen du. Tódô kem kdà odoy Samsun semdihot du yóm tébéd fét le bè sigelen ne bè henmuen, lómón kegnómen du lómón ke olo balu kdungon deng mlób, tódô gotu hto.

¹⁵ Ton Samsun yóm tiol kakim kudà asnu lomi matay masà bè yó. Ominen mulut du ne bogulen kul ne botong lemibu Flistin hnatayen.

¹⁶ Omin Samsun mon du, “Tek olo kakim kudà asnu, botong lemibu ghatayu. Tek olo kakim kudà asnu, tey wen luduku bè tonok.”

¹⁷ Timbow deng kmonen du, ominen mbot yóm kakim kudà asnu nogoten. Lemwót bè yóm kdaw yó, yó hlós boluy le du yóm benwu yó, “Ngà Bulul Kakim.”

¹⁸ Tódô gefet bè Samsun yóm tey sidek kleengen, ominen tmaba ebè Dwata, monen, “Ó Dwata, deng tey kehegmoem do, okóm ni denge tô matay lemwót bè ksidek kleengu ne angat kenfô le o ni kem Flistin là temngón kóm nii.”

¹⁹ Duhen yó, tódô wen él hesut Dwata béléen gu bè yóm sotu ngà sbong bè yó bè Lihi. Ne omin Samsun yó minum ne mkó se yóm ksidek kleengen. Ne yó boluyen du yóm él yó, “Sfut Él yóm tau tmaba.” Ne ni kmoen ni sana tolo knóen bè yó bè Lihi yóm sfut yó.

²⁰ Botong lewu folò halay Samsun malak kul yó kem tau Israél bè yóm igò le tolo nô lem hólól yó kem Flistin.