Kmukum 14 - Udél Dwata: Gna Kesfasad ne Lomi Kesfasad

Yóm nged Samsun

¹ Sotu kdaw lemwót Samsun mosol ebè yóm sotu benwu yó kem Flistin boluyen Timna ne bè yó gónón mton yóm sotu libun Flistin.

² Bè yóm kuléken ebè gónóen tulónen ke maen ne yéen, monen mò kul, “Wen libun Flistin tonu bè Timna. Nwa ye do mò yehenu.”

³ Okóm tey kekbê le du le maen ne yéen, mon le mò du, “Moen du ke ditu gónóm mebel yehen bè yó kem Flistin là temngón ke Dwata? Ilóem laen dù tonem libun bè ni kô bè kut kwen duhen ke bè yó kem dumu tau Israél?” Okóm yó mon Samsun mò ke maen, “Du yóm nóyóu mò yehenu. Nwa ye dou.”

⁴ Là kô tngón kem tuha Samsun du ke lemwót bè Dwata yóm nmò Samsun yó mò lan Dwata sembeweg yó kem tau Flistin. Bè yóm kdaw yó, tolo le gnô lem tdok kem Flistin he yó kem tau Israél.

⁵ Kewót le Samsun ne yó kem tuhahen mosol le ebè Timna. Bè yóm igò le moni bè yóm gónó le gel mulu grép yó kem tau bè Timna, gungol Samsun yóm tey ngel liyun tô demlu du.

⁶ Uni Samsun mton du, tódô hekgis Dwata ne senfék Samsun kakim yóm liyun yó. Tek són tdoken moen du, lómó kegnómen du lómón ke olon ngà kambing. Okóm là kô dog tulónen du yó kem tuhahen yóm nmoen yó.

⁷ Bè yóm kkól le bè Timna, tódô hlós Samsun ebè yóm libun niwolen ne stulón du. Tey óyô Samsun du yóm libun yó.

⁸ Sotu kdaw bè yó, bud le mógów ebè Timna le Samsun anì nan e yehen yóm libun yó. Bè yóm igoen mógów nan slob tenngel yóm liyun tehe hnatayen, ne tey ketngahen du deng mom wen tmaing tonen mngà bè tiol lówó yóm liyun.

⁹ Lemwót Samsun, wen nwahen bè yóm tneben ne kenen bè yóm igoen mógów. Ominen bemlay kul le maen ne yéen ne ken le se kul. Okóm là kô dog tulón Samsun du kul yóm kwahen du bè tiol yóm liyun deng tehe hnatayen.

¹⁰ Omin le maen hlós ebè gónô yóm libun niwol Samsun ne bè yó gónó Samsun mò ken bong bè lówóhen. Yó se kul gel adat yó kem sawang logi bélê le.

¹¹ Timbow ton yó kem Flistin Samsun, botong tlu folò ngà logi nwit le ebéléen mò dumun segbót.

¹² Yó mon Samsun mò kul, “Wen ngedu kuy. Ke tngón ye lanen gu laanen là deng skas tau bè yóm hitu buteng tekuy mò du nim mò ken ni, wen tlu folò nes bukay mò lafin nes blayu kuy ne tlu folò se yóm nes alì tilob mò nô tahen.

¹³ Okóm ke là tngón ye du lanen, yu fen bemlay du do yóm yó.” Mon le se, “Tulónem kum sen ngedem yó.”

¹⁴ Mon Samsun, “Bè yóm gel mken gónóhen gu yóm mò ken. Lemwót bè yóm kemgis yóm mi.” Botong tlu kdaw le tô mebel du lanen, okóm là kô tngón le du.

¹⁵ Bè yóm gfaten kdaw, yó nmò le sentulón le yehen Samsun, mon le, “Hol hninggelem semtulón ke tuha logihem anì tulónen kóm lan tum ngeden. Ke là, angat ntem me gónô maem ne gomongi mlób se kóm. Mone yó kô gónó ye tminok kum lewu ye maem anì mulék me élél? Yó kô atul ye?”

¹⁶ Tahu se, stulón ke Samsun yehenen mung du kiken, monen, “Là kô dog kenbong nawahem do, mom knutó nawahem ou. Deng wen ngedem yó kem weem, là sem dog tulónem du do lanen.” Mon Samsun se, “Tenngelem dé, sélét mom u ne gónóhu tmulón du anì sem le mà du ne yê, là kô tulónu du kul.”

¹⁷ Tódô ket kdaw yehen Samsun mkik béléen lem yóm hitu kdaw le mò ken. Timbow kól bè ghituhen kdaw, tódô tulón Samsun du lan yóm ngeden abay se tódô senflós yehenen mubug smólók du. Omin yehenen gotu bud tmulón du bè yó kem Flistin.

¹⁸ Ne bè yóm ghituhen kdaw gu laanen là deng sdef kdaw, sut le bè Samsun yó kem logi bè yóm syudad yó, mon le mò du, “Tedu se mi senta tneb? Tedu se kemgis senta liyun?” Bnalà Samsun lu, monen, “Ke là deng hdadu ye du yóm dou ngà safì libun, là kô tngón ye du lanen yóm ngedu.”

¹⁹ Ne tódô sut bè Samsun yóm Tulus Dwata tey kehekgisen du. Ominen lemwót mosol etu bè yóm sotu benwu Flistin boluyen Askilun nan e hmatay tlu folò kem logi bè yó ne gotu nwahen nes le ne blayen bè yó kem tau malà yóm ngeden. Kogolen bè yó tódô mulék mneged ebè le maen, ya tey sidek kebuten.

²⁰ Okóm yóm yehenen, deng mom bud hyehen le bè tólóng logi, yóm logi tehe hol dumun segbót Samsun bè yóm kmò Samsun ken bè lówóhen.