Kmukum 13 - Udél Dwata: Gna Kesfasad ne Lomi Kesfasad

Ksut Samsun

¹ Timbow bud nmò yó kem tau Israél yóm kenbê Dwata bélê le yóm sana Dwata hol kul gónó mogot, yó gónóhen hemlus kul elem hólól yó kem tau Flistin ne botong fat folò halay le kegen le nô lem hólól le.

² Bè yóm kdaw yó, wen sotu tau menwu bè Sura boluyen Manu, tau lemwót gu bè ból Dan bede libun atil yóm tuha libunen.

³ Sotu kdaw wen hógów Dwata gu bè longit sut bè yóm libun yó ne monen mò du, “Balù yóm katilem, okóm angati mlutut ne mngai logi.

⁴ Yó hlauhu kóm, hol béem abay ninum yóm tifas grép ne yó kem dumu ninum lemengel ne béem abay ken yóm là hken Dwata du kóm.

⁵ Angati mlutut ne mngai logi, hol béem abay kenleng weken abay se tódô lemwót bè ksuten kehetfingem du ebè Dwata mò tau Nasarit. Du mò angat mbut du yóm kegewà yó kem tau Israél gu lem hólól yó kem tau Flistin.”

⁶ Ominen lemwót yóm libun yó nan e tnulón tuha logihen, monen, “Wen tau Dwata gu béléu, hol lómón kmoen lómón ke hógów Dwata gu bè longit, ya tey sidek klikou. Là kóe mlos smólók du gónón gu lemwót, ne là se tulónen du dou boluyen.

⁷ Okóm yó tulónen do, angate tódô mlutut ne mngae logi. Ne yó bud udélen ebéléu, monen mò do, ‘Béem abay minum yóm tifas grép ne yó kem dumu ninum lemengel, ne béem abay ken yó kem là hken Dwata du kóm abay se yóm ngà sut yó, angat hetfing ye ebè Dwata mò tau Nasarit lemwót bè yóm kdaw ksuten efet kól bè yóm kdaw katayen.’ ”

⁸ Omin Manu mni bè Dwata, monen, “Ó Dwata, hol bud hógówem ebélê me yóm tau deng hógówem yó koni anì tulónen kum angat kmò me du yóm ngà ke sok sut.”

⁹ Tahu se, bnalà Dwata yóm hni Manu yó, tódô bud sut bè yehen Manu yóm hógów Dwata gu bè longit bè yóm igoen tolo myón bè uma le. Okóm ke Manu kun, yóm tuha logihen là nóen bè yó.

¹⁰ Tódô kendel mlóy ebè tuha logihen tulónen du, monen, “Ngem, deng bud sut béléu yóm tau tehe sut béléu yóm sotu kdaw yu.”

¹¹ Tódô mung ke tuha libunen Manu, mógów le ebè yóm tau yó ne mon Manu mò du, “Uu kô yóm tau tehe stulón ke tuha libunu yu?” “Ou se,” mon yóm tau yó.

¹² Ne yó mon Manu mò du, “Ke deng tahu se yóm monem, tedu se hlolò me du yóm ngà logi sut yó? Tedu se angat nmoen?”

¹³ Yó balaen du yóm hógów Dwata, monen, “Hyu ke hol nmò yehenem yóm deng hlolou du.

¹⁴ Hol béen abay wen kenen lemwót bè yó kem grép. Hol béen abay ninum yóm tifas grép ne yó kem dumu ninum lemengel ne béen abay ken yóm là hken Dwata du béléen. Hyu ke hol nimónen yóm deng hlolou du yó.”

^15-16 Là kô tngón Manu du ke hógów Dwata gu bè longit yóm dumun stulón yó, yó monen mò du, “Nam na nô bè ni he, na me tmétê béléem ngà kambing.” Mon yó sem hógów Dwata yó, “Yó sen, naw na nô bè ni okóm là kô kenu du yóm tô hkenem do yó. Okóm ke hol henkenem se o, yake tódô hkekebem ne mò dsuem ebè Dwata.”

¹⁷ Mon Manu se, “Ó Wè, tulónem kum boluyem dé. Ke tahu se yóm tulónem kum, móyô me ke wen gónó me hegfan du yóm kadat me kóm.”

¹⁸ Ne yó balaen du yóm hógów Dwata yó, monen, “Moen du ke snólókem boluyu? Baluen ke tulónu kuy, là kô glileb ye du.”

¹⁹ Omin Manu ma yóm ngà kambing ne wen halay suen bè yó ta botu, ominen demsù du ebè Dwata. Ne wen tey hentaw ton nmò Dwata igò le temngel le Manu lewu le yehenen.

^20-21 Yóm igoen dmilóf eta yóm ofi lemwót bè yóm gónô Manu demsù, tódô ton le Manu ne yehenen yóm hógów Dwata yó koni haway etta bè longit, mung bè dilóf ofi efet tódô lana lem mata le. Timbow tngón le hógów Dwata gu bè longit yóm tau yó koni, tódô le hegluduk bè tonok lewu le yehenen. Ne là bud ton le du ne yóm hógów Dwata yó.

²² Yó mon Manu mò ke yehenen, “Bang katay te ni abay se deng ton te Dwata.”

²³ Okóm yó balà yehenen du, monen, “Ke yó kóyô Dwata hnatayen tu, sana là henmóyóen du ne yóm dsù te ebéléen ne sana là htonen du kut ne ni kem deng ton te ni ne sana là deng wen ne tulónen kut bè nim kdaw ni.”

²⁴ Bè yóm ksut blutut yehen Manu, logi yóm ngaen, yó boluy le du Samsun. Tey kuyag Dwata du yóm ngà yó ne tey tilob kenoken.

²⁵ Ne nbut yóm Tulus Dwata hekgis du bè yóm igoen nô bè Kamfù Dan bè blóng le benwu Sura yóm benwu Istaol.