Kem Lingón 99 - Udél Dwata: Gna Kesfasad ne Lomi Kesfasad

¹ Dwata se yóm Hol Geta. Hol le gotu kenkel yóm kdéen tau. Myón bè yóm gónón kmamal bè gónón sóól yó kem hógówen boluyen sirubim. Hol megsinsig yóm klamangen tonok.

² Tey mfasang yóm Dwata bè Sayun. Du se hol mogot yóm kdéen tau bè klamangen benwu.

³ Hol dóyón le yóm tey kegetahen ne tey kehtaw le du yóm kóm boluy. Laen dù belenen yóm kóm boluy.

⁴ Uu se yóm Hol Geta laen dù là gbeken du, henlom nawahem yóm tedeng, laen kô dù mtukul nfihem. Sal tedeng yóm gel nmoem bè Israél, ne sal tódô.

⁵ Hol dóyón tekuy Dwata yóm sana kut Dwata hol gónô mogot. Heglaan tekuy bè soluhen, abay se laen dù belenen.

⁶ Lewu le Musis Aron yó kem tau gel blóng ebéléen. Samwél snéen sotu gel tmaba ebéléen. Tey kni le tóbóng bè Dwata, ne bnalà Dwata se yóm hni le.

⁷ Mudél ebélê le gu lem yóm lobun tmahà, ne nimón le yó kem kóm hlau kul dalang se yó kem kóm hlolò kul.

⁸ Ó Dwata yóm sana hol kum gónô mogot, deng bnalaem lu. Uu se yóm Dwata gel hmifót salà, okóm sal gel tnafakem yóm sidek nmò le.

⁹ Hol dóyón tekuy yóm sana kut Dwata hol gónô mogot, ne tmaba tekuy ebéléen bè yóm kun bulul bè Jirusalim, abay se laen kô dù belenen yóm sana kut Dwata hol gónô mogot.