Kem Lingón 98 - Udél Dwata: Gna Kesfasad ne Lomi Kesfasad

Kkamal Dwata yóm klamangen

¹ Semngal tekuy ebè Dwata yóm lomi sngal, yakà deng nmoen du yó kem tey hentaw ton. Mlan bè kfasangen ne kólósen yóm kgemoen bè yó kem hohonen.

² Deng heglalag Dwata yóm kegmoen, ne deng hegfanen bè ket benwu yóm tey ktedengen.

³ Deng hendemen yóm tehe fasaden yó kem tau Israél, duhen yóm kbong nawahen kul ne yóm kteneben bélê le. Deng ton klamangen benwu yóm khewaen kum yóm kum Dwata.

⁴ Yóm klamangen benwu, hol ye hligal mensag ebè Dwata, Hol ye hligal semngal, sngal ye yó kem sngal dmóyón du.

⁵ Sngal ye yóm sngal dmóyón ke Dwata mlan bè yóm gel kenbit ye, hol dóyón tekuy mlan bè yóm gel kenbit ye alì tilob utómen.

⁶ Dóyón tekuy mlan bè yó kem féw, mlan bè yóm féw nmò le lemwót bè hanga safì. Hol tekuy hligal mensag bè solu Dwata yóm Hol Geta.

⁷ Hol hligal se kun yóm mohin ne yóm kdê nô lemen. Hol hligal se kun yóm klamangen benwu dalang se yóm kdê nô lemen.

⁸ Yó kem él mlel, hol sendofì ye hólól ye, ne yó kem bulul, hol ye hligal semngal se kuy

⁹ bè solu Dwata. Yakà kól Dwata nan e knukum klamang benwu. Knukumen klamang benwu mlan bè ktedengen, ne laen kô dù mtukul nfihen.