Kem Lingón 97 - Udél Dwata: Gna Kesfasad ne Lomi Kesfasad

¹ Dwata se yóm Hol Geta. Hol hligal he yóm klamangen benwu. Hol hligal he yó kem benwu kilil mohin.

² Wen tey lobun ne kifu mget hmilol du. Yóm ktedengen ne yóm kukum tedeng nwiten yóm hembegel yóm kogoten tau.

³ Wen tey ofi nô bè soluhen, gotu kenen yó kem hohonen.

⁴ Yóm ksilaen tendo mkal bè klamangen benwu. Bè yóm kton le du yó kem tau, gotu le likò, botong setbol kkel le.

⁵ Gotu le mnò bè soluhen yó kem bulul, lómón knò tolu. Mnò le bè solu yóm Dwata bè klamangen benwu.

⁶ Heglalag longit yóm tey ktedengen, ket benwu mton du yóm tey klinggelen.

⁷ Yó kem tau gel tmaba ebè yó kem dwata kéng, gotu le mulék myak, lu se yó kem tau alì heklabak bè yó kem dwata laen dù muhen. Yakà kdê yó kem dwata kéng, gotu le hegdungul ebéléen.

⁸ Deng gungol yó kem tau bè Sayun yóm kkukumem, dalang se yó kem tau bè kdê syudad bè Juda, ya tey kligal le bè yóm kungol le du.

⁹ Yakà uu du, Dwata yóm hol dandónen geta bè klamangen benwu. Uu se hol geta senta yó kem dumu dwata.

¹⁰ Tey kbong nawa Dwata kul yó kem tau kembê du yóm sidek. Sal gel bnenteyen yó kem tau teneb béléen. Lenwaen lu lem hólól yó kem tau mò sidek.

¹¹ Yó nmò Dwata bè yó kem tau mimón du, sal gel wen layag bélê le, ne gel hefligalen yó kem tau tedeng nmò le.

¹² Yu kem tau mò du yóm tedeng, hol ye hligal bè Dwata. Hol dóyón ye yóm kun boluy.