Kem Lingón 96 - Udél Dwata: Gna Kesfasad ne Lomi Kesfasad

Lingón bè yóm hol kegeta Dwata bè kdéen

¹ Sngal tekuy ebè Dwata yóm lomi sngal. Kdéen tau bè klamang benwu, gotu ye semngal ebè Dwata.

² Semngal tekuy ebè Dwata, mung du yóm tey kdóyón tekuy du. Ket kdaw tekuy heglalag du yóm tulón hyu lemwót béléen, duhen yóm deng kehewaen tekuy.

³ Hol heglalag tekuy bè yó kem dumu tau yóm tey kegetahen, ne yóm tey kegbeken lem blóng yóm kdéen tau.

⁴ Tey mfasang yóm Dwata, tey knóón semdóyón du. Yake wen klikò kuy du senta yóm klikò kuy yó kem dwata kéng.

⁵ Yó kem kul dwata yó kem tau bè dumu benwu, hono dwata lenbù nmò le. Okóm yóm kut Dwata, du se tehe dmimun du yó kem longit seglafin.

⁶ Yó ton béléen yóm tey klinggelen ne yóm tey kegetahen. Yó hol heklóón du yóm kun Gónô, duhen yóm tey kfasangen ne yóm tey ktiloben.

⁷ Hol dóyón tekuy Dwata, kdê tekuy kem tau talak tonok. Hol dóyón tekuy yóm tey kegetahen ne yóm tey kegbeken.

⁸ Hol dóyón tekuy abay se tey minggel boluyen. Mógów tekuy ebè Gónóen, eles tekuy mit yóm mò blay tekuy du.

⁹ Ke sut lem blóng tekuy, hol tekuy mtud bukol bè soluhen, abay se du yóm Dwata laen kô dù belenen. Hyu ke wen hol klikò tekuy du, kdê tekuy kem tau bè klamangen benwu.

¹⁰ Yó hol tulón ye bè kem tau bè klamangen benwu, mon ye mò kul, “Yóm Dwata, du se yóm hol dandónen geta kmamal yóm klamangen. Tey mbegel kmoen du yóm benwu, là kóen sliwo. Angat knukumen yóm kdéen tau, ne tey tedeng yóm kkukumen kul.”

¹¹ Ó tonok ne longit ne mohin ne yóm kdê nô lemen, hol ye hligal se kuy sok kól Dwata.

¹² Dalang se yó kem tniba ne dnadu ne kdê yó kem tmowok tahen, hol ye hligal se kuy. Ne yó kem koyu dlag, angat le gotu hligal mensag se kul

¹³ sok kól Dwata mò kmamal yóm klamangen. Angat tey tedeng yóm kkamalen kdéen tau, laen kô dù mtukul nfihen.