Kem Lingón 95 - Udél Dwata: Gna Kesfasad ne Lomi Kesfasad

Lingón dmóyón ke Dwata

¹ Géhél ye ne, na tekuy e dóyón Dwata. Hol kuy hligal semngal ebéléen, yakà kenlungen tekuy.

² Hloni tekuy ebè Dwata, mung du yóm tey keslamat tekuy béléen. Hol tekuy hligal semngal, yóm sngal mò dmóyón du.

³ Abay se yóm gónó tekuy mogot, du se Dwata hol gembek bè kdéen. Du se hol dandónen geta gembek senta yó kem dwata kéng.

⁴ Gotu knamalen yóm klamangen benwu, lenwóten bè yó kem hol kilib nelem kkólen bè yó kem hol bulul geta.

⁵ Bud knamalen snéen yóm klamang mohin tehe nmoen, ne yóm klamang tonok tehe dlimunen.

⁶ Géhél ye ne, mtud kuy bukol bè soluhen, ne tmaba kuy ebéléen. Du se yóm hol gónó tekuy mogot, yóm tehe mifil tekuy.

⁷ Du se yóm kut Dwata, tekuy se kem tau sen-gyoken, lómón ke ubiha gel hótóben. Hol hnungol tekuy kemdaw ni yóm udél Dwata ebélê tekuy, yó monen,

⁸ “Hol bê ye hgel kulu ye. Bê ye hkél bè kgel kulu yó kem tehe fù ye ekni bè yóm tehe knô le bè yóm benwu Miriba. Ne senged snéen yóm tehe knô le bè Masa, bè yóm benwu laen hol wen tauhen.

⁹ Bè yó tehe gónó le tmilów dou, igò le deng hónô mton du yó kem gel nmou lem blóng le.

¹⁰ Botong fat folò halayen kegenu lembut kul, botong monu, ‘Hono kem tau tlas kehedem le. Là móyô le mimón du yó kem hlauhu kul.’

¹¹ Ya tey sidek kebutu kul, botonge smafà, monu, ‘Là kô ye gehlós edu yóm benwu blayu kuy, yóm benwu mò gónó ye henek nô.’ ”