Kem Lingón 94 - Udél Dwata: Gna Kesfasad ne Lomi Kesfasad

¹ Ó Dwata, uu yóm Dwata fen gel meles. Hol hegfanem yóm ktedengem, Dwata yóm Dwata fen gel meles.

² Uu se fen kmukum yóm kdéen tau, géhél nem e knukum yó kem tau hegmón. Kukumem kul yóm tafak geblà bè yóm deng nmò le.

³ Kmò kegenen de, Dwata? Kmò kegenen de yóm alì kehegmón le yó kem tau gel mò sidek?

⁴ Són udél heklabak btang bè sumóng le. Henklabak le yó kem deng nmò le.

⁵ Tey kehegnok le yó kem kóm tau, Dwata, hensidek le yó kem tau kenbong nawahem.

⁶ Botong hnatay le yó kem libun bolu ne yó kem tau milo, ne bnonok le kem ngà hikit.

⁷ Yó mon le, “Là kô ton Dwata tekuy. Yóm Dwata yó kem tau Israél, là kô hendemen du kun.”

⁸ Ten-gama ye, yu kem tau nungel. Kilón de kbaling ye tau hulung hedem?

⁹ Dwata yóm mò klingu ye. Bokong kô kun? Bud nmoen se mata ye. Butô kô kun?

¹⁰ Ke tnafaken yó kem tau bè yó kem dumu benwu, là gbeken tmafak kuy kô? Gotu tngónen kdéen, là tngónen du kô yó kem gel nmò ye?

¹¹ Gotu tngón Dwata yóm kehedem tau, tngónen laen kô gónón e kól.

¹² Ó Dwata, hligal le kul yó kem tau deng wen gónóm semtódô kul, dalang se yó kem tau wen gel tolokem kul lemwót bè kóm hlau.

¹³ Bè yóm kdawen wen gel gfà le, sal gel henwósem ta le, efet hokolem yóm tey sol nelem mò gónóm hebtang yó kem tau gel mò sidek.

¹⁴ Yóm Dwata, là kô nan e kenbê kul yó kem kun tau, ne là kô tódô bayaen kul yó kem kun tau nfun.

¹⁵ Yó kem tau tedeng kmò le, angat bud mulék ebélê le yóm kukum tedeng, ne tódô kdê le gotu lemolò du.

¹⁶ Tau du de mofin dou bè yó kem tau gel mò sidek? Tmau du de mfi dou bélê le?

¹⁷ Ke tehe là tnóbóng Dwata dou, là knahem du ne deng katayu.

¹⁸ Yó monu, “Tlokobe.” Okóm yóm là konol yóm kbong nawam dou, Dwata, yó se temgel dou.

¹⁹ Ke wen gónón alì sidek kegnómu du, gel henyuhem nawaw, ne yó se gel bemlay dou kligal.

²⁰ Laen kô dù kóm du, Dwata, yó kem tau mogot kukum là tedengen, yó kem tau heswì le kogot le kukum.

²¹ Ssotu atul le hemsidek yó kem tau tedeng, mom hatay kkukum le du yó kem tau laen dù salà le.

²² Okóm Dwata se yóm dou gónó hofin. Du se yóm botu hol mbegel gónóhu e mlo.

²³ Angat hulék Dwata eta yó kem tau gel mò sidek yó kem ksidek nmò le. Angat gotu genlaen lu lemwót bè yó kem salà le. Yóm Dwata hol gónó tekuy mogot fen gemlà kul.