Kem Lingón 93 - Udél Dwata: Gna Kesfasad ne Lomi Kesfasad

Lingón bè yóm hol kegeta Dwata

¹ Dwata se yóm hol dandónen geta mogot klamangen. Yó henged nes leseken, duhen yóm kegetahen ne yóm tey kekgisen. Tey mbegel kehdaen du yóm benwu, là kóen na a sliwo.

² Lemwót bè hol kbuten, Dwata, tey mbegel yóm kkamalem yóm klamangen. Gu laanem là deng mbut du yóm kdéen, deng sana kem yó ne yóm keDwatahem.

³ Tey lemwók yóm mohin bong, Dwata, ne tey sidek lungkul lewóken.

⁴ Dwata se yóm hol dandónen geta kmamal longit. Yóm kun kgis, mkay senta kgis yóm tey lewók mohin, ne mkay senta yóm tey lungkulen.

⁵ Yó kem kóm hlau, Dwata, là kóen megetles. Ne yóm kóm Gónô, yó heklóón du, duhen yóm klaen dù belenem laen kô dù tul sónen.