Kem Lingón 92 - Udél Dwata: Gna Kesfasad ne Lomi Kesfasad

Lingón le bè kun kdaw Dwata

¹ Tey hyu ke gel me slamat bè Dwata. Tey hyu semngal du yó kem sngal dmóyón ke Dwata yóm Dwata Hol Dandónen Geta.

² Tey hyu ke ket hlafus me tmulón du yóm là konol yóm kbong nawahem kum, ne ke ket kifu me tmulón du yóm kóm kteneb bélê me.

³ Bè yóm kesngal me, hmung me yó kem gel kenbit me, tey tilob kessutóm le.

⁴ Tey kehefligalem dou, Dwata, bè kdê yó kem deng gendengem béléu. Ke hendemu yó kem deng gendengem yó, botonge semngal lemwót bè kligalu.

⁵ Tey tennga, Dwata, yó kem hentaw ton gel nmoem. Tey ngelem yóm kóm kehedem.

⁶ Yóm tau laen dù tngónen, balù udì ke glileben kun nim ni. Senged se yóm tau nungel, là kô glileben du.

⁷ Tey mahil klowil le yó kem tau gel mò sidek, lómón ke kluon, mahil tmowok. Okóm angat kól yóm kdaw angat le gotu meglà, ne laen kô dù sónen yóm keglà le.

⁸ Okóm uu se, Dwata yóm hol geta bè longit, ne laen kô dù sónen yóm kegetahem.

⁹ Kdê yó kem hohonem, Dwata, angat le gotu matay. Angat gotu senklahem lu kdê yó kem tau gel mò sidek.

¹⁰ Okóm deng tey kehekgisem dou, lómón kgis yóm safì tudu tabag. Ne tey kehyu kegnómu du lemwót bè yóm nmoem béléu.

¹¹ Deng ton matahu yóm là kegmò yó kem hohonu, ne deng dou klingu mungol du langat yó kem hohonu gel mò sidek.

¹² Okóm kul yó kem tau mimón ke Dwata, tey hyu klowil le hol lómón ke lefò tey tilob ktowoken. Ne tey kbegel le, hol lómón kbegel yóm koyu sidar bè Libanun.

¹³ Yakà deng nilihu kul bè gónô Dwata. Ne tey hyu kenok le bè yó bè kun gónô Dwata.

¹⁴ Balù yóm deng ktuha le, sana kbungu le. Là kóen monol kgis le bè yóm kmò le nmò.

¹⁵ Yó mon le, “Tey ktedeng Dwata. Du se yóm botu mbegel dou gónó heklung. Laen kô dù sidek béléen.”