Kem Lingón 91 - Udél Dwata: Gna Kesfasad ne Lomi Kesfasad

Lingón bè yóm kofin Dwata tekuy

¹ Yóm tau tendo hofin bè Dwata ne ke henek bè kofinen du, yóm Dwata laen dù là gbeken du,

² du se yóm tau gembek mon du mò ke Dwata, “Són uu, Dwata, gónóhu gel heklung ne gónóhu gel hofin. Són uu yóm dou Dwata, són béléem gónóhu smalig.”

³ Abay se yóm Dwata, gbeken hemseng du ebéléem yó kem angat gel tô gfaem. Hensengen ebéléem snéen yó kem des mit hatay.

⁴ Yó kmoen kóm, lómón ke onuk, lenambungen uu laan hafaken, ne laen kô dù hemenem. Yóm là konol nawahen ebéléem, yó se mò ofinen kóm ne mò klungen kóm.

⁵ Béem knikò yó kem knikò sut kifu, duhen ke yó kem tódô muluk ebéléem kemdaw,

⁶ duhen ke wen des gónó mahil gbót tódô sut kifu, dalang se ke wen sidek mit hatay sut kemdaw, béem knikò lu.

⁷ Anien ke lemibu tau matay masà klohokem, ne sfolò libu masà gu hilolem, laen kô dù tódô béléem.

⁸ Tódô olohem mton du ktafak Dwata kul yó kem tau gel mò sidek.

⁹ Lemwót bè yóm khofinem ke Dwata, ne yóm keheklungem bè yóm Hol Dandónen Geta bè kdéen,

¹⁰ yó gónón laen dù gfà tódô kóm, ne gónón laen dù tau gel mò sidek hloni bè gónóem.

¹¹ Yakà wen hógów Dwata gu bè longit mò mentey kóm balù kihu gónóm e solu.

¹² Yó kmò le kóm, lómón ke nogot le uu bè sbalà sigelem anì là tódóen bè botu tihem.

¹³ Angat gotu ndaem lu elaan yó kem liyun ne yó kem ulal, balù nô klóbô yó kem liyun, ne balù nô kalas yó kem ulal.

¹⁴ Yó udél Dwata, monen, “Gel lenwau yó kem tau kembong nawa dou, ne gel nofinu yó kem tau mogot béléu.

¹⁵ Ke tmaba le ebéléu, bnalau lu. Ke wen gfà le, elese nô bélê le. Tendo gel lenwau lu, ne tey kadatu kul.

¹⁶ Yó ofol blayu kul, angat htahau klowil le, ne angat lenwau lu.”