Kem Lingón 90 - Udél Dwata: Gna Kesfasad ne Lomi Kesfasad

BOK 4 Kem Lingón 90—106 Lingón Musis yóm tau Dwata

¹ Ó Dwata, yóm gónó me mogot, són uu se tendo gónó me glébéd lemwót bè kbuten.

² Gu laanem là deng dmimun du yó kem bulul ne yóm klamangen benwu, deng sana kem yó ne yóm keDwatahem, ne laen kô dù sónen yóm keDwatahem yó.

³ Okóm kul yó kem tau, bud gel hulékem lu bè kfung bè yóm tehe gónó le gu lemwót. Bud gel hbalingem lu kfung.

⁴ Yóm lemibu halay béléem kóm, Dwata, lómón ke tek sendaw, lómón yóm ekimel deng sana miwes, ne lómón yóm sotu uras kifu là kóen legen.

⁵ Là kóen legen yóm klowil me lómón ke hkonulem mi bè dunuk, ne lómón ke olo kna yóm klowil me là kóen legen. Kéng tô me bnes lomi sut hlafus,

⁶ tilob ktowoken hyu wen bulóken. Timbow kifu bè yó deng sana menes.

⁷ Lemwót bè lebutem, Dwata, gónó me meglà. Ya tey sidek klikò me du yóm kebutem yó.

⁸ Gotu suem dyó bè soluhem yó kem salà me. Kdê yó kem salà bnos me, gotu tonem.

⁹ Igò me mowil, Dwata, igoen se nô ta me yóm kebutem kum. Sal dolong bè kegesón yóm klowil me.

¹⁰ Yóm klowil me, olon gefet bè hitu folò halay. Ke wen kgis me, gefet me bè wolu folò halay. Okóm yóm klawi me mowil yó, tey dê gónó me glayam, ne tey dê lenóngón nawa me. Là kóen té yóm klowil me, sana me mfu.

¹¹ Tau du de deng gemnóm du yóm alì ksidek kebutem, Dwata? Ke deng gnómen, nawaw deng tey sidek klikoen.

¹² Hol heftulón nawam kum yóm kukol yóm klowil me anì eles me temgama.

¹³ Kilón de kkóhen yóm kebutem kum? Hol knoduhem mi sen, Dwata, kem tau tóbóng lówóhem.

¹⁴ Hol hegnómem kum ket hlafus yóm là konolen yóm kbong nawahem kum, anì yó, sónmò me semngal ne hligal bè yóm klawi me mowil.

¹⁵ Tey bong yóm keblat nawa deng blayem kum ekni bè yóm tehe igò me glayam. Hol lómón yó dé bud kbongen yóm kligal tles bud blayem kum ni.

¹⁶ Htonem kum mi kem kóm tau yóm tey kegbekem. Ne bud htonem yó kem semfu gu bélê me snéen yóm tey klinggelen yóm kegbekem yó.

¹⁷ Hol senflósem kmudung kum, Dwata, yakà uu du yóm mogot kum. Knudungem mi anì wen gónón e kól yóm kdê nmò me.