Kem Lingón 9 - Udél Dwata: Gna Kesfasad ne Lomi Kesfasad

Lingón Dabid

¹ Ó Dwata, hotuhu nawahu dmóyón kóm. Gotu tulónu yóm kdê tey tennga deng nmoem.

² Tey bong kligalu béléem. Sngalu yóm sngal dmóyón kóm, Dwata yóm Dwata hol Dandónen Geta.

³ Bè yóm klóy le mulék yó kem hohonu, gotu le tlokob bè soluhem ne gotu le matay.

⁴ Yakà deng nfihem ou. Tey tedeng kkukumem dou igoem myón bè yóm gónóm myón kmamal.

⁵ Deng gotu bnólówem yó kem tau mò sidek bè dumu benwu. Deng gotu genlaem lu. Gotu hlanahem boluy le laen kô dù tul sónen.

⁶ Deng guta kem hohonu ne yóm keglà laen dù tul sónen. Yó kem syudad le, deng gotu genbaem ne laen dù bud hemtulón kul nawa.

⁷ Okóm ke Dwata, laen kô dù tul sónen yóm kogoten tau. Deng eles hbegelen yóm gónón myón kmamal mò gónón mit du yóm kukum tedeng.

⁸ Knukumen yó kem tau bè klamangen benwu mlan bè ktedengen. Knukumen tau mlan bè klaen dù mtukul nfihen.

⁹ Dwata se yóm kul gónó e mlo yó kem tau lenunog, ne gónó le hofin bè yóm kdawen wen gfà le.

¹⁰ Yó kem tau temngón kóm, Dwata, són uu snalig le. Abay se là kô nem e gel bayà kul yó kem tau hmebel kóm.

¹¹ Sngal tekuy yóm sngal dmóyón ke Dwata yóm Dwata kmamal lemwót bè Sayun. Heglalag tekuy bè kem tau bè klamangen benwu yóm kdê deng nmoen.

¹² Yakà gel bnelesen du litô yó kem tau laen dù gmò le. Là kô nan e tódô bayà kul mkik yó kem tau wen gónó le glayam.

¹³ Ó Dwata, hol knoduhem ou. Tenngelem yóm keglayamu bè yó kem tau kmutó nawa dou. Skotem ou lem hatay,

¹⁴ anì bud dóyónu uu bè gónón wen bè bak tikeb Jirusalim, anì hligale dmóyón kóm bè yó lemwót bè yóm deng kehewaem dou.

¹⁵ Yó kem tau bè kem dumu benwu, deng le mokol sól mò gónó le kemfô kem dumu tau, deng mom lu btang elem yóm sol nokol le.

¹⁶ Tey tótól Dwata bè ktedeng kkukumen. Yó kem tau mò sidek, gholot le bè yóm sidek nmò le.

¹⁷ Angat le mógów elem hatay yóm kdê tau mò sidek, yó kem tau bè dumu benwu deng kembê ke Dwata.

¹⁸ Yó kem tau élél, là kóen hlós keklifót Dwata kul. Ne yóm nefet nawa yó kem tau laen dù kwa le, là kóen na a lana.

¹⁹ Hekmóni, Dwata. Là hyuhen ke natù le uu kem tau. Knukumem bè soluhem yó kem tau bè dumu benwu.

²⁰ Heslafem lu bè klikò le, Dwata. Hegnómem kul olo le tau tonok se kul.