Kem Lingón 89 - Udél Dwata: Gna Kesfasad ne Lomi Kesfasad

Lingón bè yóm kwen gfà yó kem tau Israél

¹ Ó Dwata, tendo lingónu yóm là keskóhen yóm kbong nawahem kum. Laen dù sónen yóm tendo gel keheglalagu du yóm là konol nawahem.

² Tngónu yóm kbong nawahem kum, laen dù mtukul sónen. Ne yóm là kili nawahem ebélê me, hol lómón yóm là kili yóm longit.

³ Deng tehe monem, “Wen fasadu yóm tau deng néléku, duhen Dabid yóm sotu tau tóbóng lówóhu.

⁴ Yó tehe fasadu du, monu, ‘Sal gel wen bè yó kem semfu gu béléem baling tau hol geta mò mogot benwu bélê ye, ne là kô nmou du sónen yóm kogot ye benwu.’ ”

⁵ Ó Dwata, kdê yó kem gel nô bè yó kem longit seglafin, gotu le semngal. Utóm sngal le yóm kdê hyu gel nmoem, ne yóm là konol nawahem.

⁶ Laen dù nô bè longit ke skél kóm, Dwata. Laen kô dù bè yó kem nô bè yó ke semnged kóm.

⁷ Balù yó kem deng genlalem bè yó, gotu wen klikò le kóm. Tey kadat le kóm yóm kdê le.

⁸ Ó Dwata yóm Dwata gónóhu mogot, yóm Dwata laen dù là gbeken du laen dù bud mfasang sentahem. Tódô gfan bè kdéen yóm là konol nawahem, Dwata.

⁹ Gotu knamalem yóm tey mohin lamang, ne gbekem henek du balù nô kbong lewóken.

¹⁰ Uu se tehe hmatay du yóm blol bong nô lem mohin boluyen Rahab. Lemwót bè yóm tey kegbekem, yó gónón laen dù gmò le béléem yó kem hohonem.

¹¹ Kóm funen yóm klamangen longit, ne bud kóm funen snéen yóm klamangen tonok. Uu se tehe mò du yóm klamangen benwu, ne gotu nmoem snéen yóm kdéen nô tahen.

¹² Deng nmoem yóm fi debwak ne deng nmoem se yóm fi leged. Yóm bulul Tabur ne yóm bulul Hérmun, lómón ke eles le tendo hligal semngal ebéléem.

¹³ Teyi mfasang, Dwata, ne teyi gembek.

¹⁴ Yó hol hembegel du yóm kogotem tau, duhen yóm tey ktedeng kmoem ne yóm tey ktedeng kogotem kukum. Tendo gfan bè kdê nmoem yóm kbong nawahem kum ne yóm là konol nawahem ebélê me.

¹⁵ Tey le hligal yó kem tau tmaba ebéléem hlan le bè sngal le. Tendo nmò le yóm gónón hyu nawahem ebélê le.

¹⁶ Lemwót bè yóm gel któbóngem kul, yó gónón tendo wen kligal le lemwót hlafus kól kimel. Tey kdóyón le kóm lemwót bè yóm tey kehyu kmoem ebélê le.

¹⁷ Tey kehgmoem kum bè yó kem hohon me. Yó gónón laen dù gmò le bélê me lemwót bè yóm tey kbong nawahem kum.

¹⁸ Uu se, Dwata, deng tehe mélék du bélê me yóm tau mò mofin kum, yakà uu du yóm Dwata yó kem tau Israél yóm Dwata laen dù belenen. Uu se tehe mélék du yóm tau mò tau hol geta bélê me.

Yóm fasad Dwata ke Dabid

¹⁹ Ó Dwata, wen tehe hegfanem ekni bè yó kem tau tóbóng lówóhem alì teneb. Yó tehe monem mò kul, “Deng tnóbóngu yóm sotu sendalù alì tótól bè kwiten sfatay. Deng néléku lem blóng yó kem dumuhen mò henbalingu tau hol geta mogot benwu,

²⁰ duhen Dabid se yóm deng néléku yó, sotu tau tóbóng lówóhu. Deng hetwélu hnolo te kuluhen mò ilô yóm deng kéléku du.

²¹ Eles tendo nô béléen yóm kgisu. Ne lemwót bè kfasangu gónón mbegel ktauhen.

²² Laen dù gmò le béléen yó kem tau hmohon du. Senged se yó kem tau gel mò sidek, laen kô dù gmò le béléen.

²³ Angat gotu genlau yó kem tau hmohon du, ne gotu hnatayu yó kem tau kmutó nawa du.

²⁴ Tey tendo kbong nawahu du yóm Dabid, là kóen monol yóm nawahu ebéléen. Tendo gel hegmou bè yó kem hmohon du.

²⁵ Hlamangu yóm benwu nogoten, lenwóten bè yóm mohin Miditiranyan kól bè yóm él Yufratis.

²⁶ Yó angat mon Dabid mò dou, ‘Uu se dou Mà, ne uu se yóm dou Dwata. Ne bud uu se yóm gónóhu gel heklung, ne yóm gel lemwà dou.’

²⁷ Ne yó angat nmou bè Dabid, angat blayu du yóm kun kwalis yóm ngà logi twogu. Nmou hol geta bè yóm kdéen tau hol geta talak tonok.

²⁸ Là kô klifótu du yóm deng fasadu du. Ne laen kô dù mtukul sónen yóm deng senfasad me.

²⁹ Laen kô dù sónen yóm kogoten benwu, hol lómón yóm klaen dù són longit. Sal gel wen bè yó kem semfu gu béléen angat baling tau hol geta.

³⁰ Okóm ke là nimón le du yó kem dou hlau yó kem tau semfu gu béléen, ne ke là lolò le du yó kem dou hlau kul,

³¹ ne ke snonol le yó kem dou hlolò kul, ne là sù le du bè nawa le yó kem dou hlau kul,

³² angat tey ktafaku kul bè yó kem salà le yó anì na le hol glayam lemwót bè yó kem sidek nmò le.

³³ Okóm ke Dabid, là kô naw e tenflok du yóm kbong nawahu du, ne là kô klifótu du yóm deng fasadu du.

³⁴ Là kô gbeku gembà du yóm deng senfasad me. Balù sotu bè yó kem deng fasadu du yó, là kô naw e klifót du.

³⁵ Deng tehe wen fasadu ke Dabid hlanu bè dou boluy, ne là kô tenlesu du. Laen kô kéng nmou bè Dabid.

³⁶ Yó tehe fasadu du, tendo gel wen semfu gu béléen, ne tendo bnenteyu yóm kogot le benwu bè yóm igoen tolo wen kdaw.

³⁷ Là kóen na a mili yóm kogot le benwu, lómón yóm là kili yóm bulón nô bè longit.”

Lingón langag lemwót bè yóm là kegmò yóm tau hol geta bélê le

³⁸ Okóm ni, Dwata, deng lenbutem yóm tau hol geta deng nélékem. Deng tódô bayaem, deng kenbéem.

³⁹ Deng genbaem yóm deng tehe senfasad ye yóm tau tóbóng lówóhem yó. Deng kóhem bè kuluhen yóm kurunahen, ne deng botem ebè tonok.

⁴⁰ Deng gotu genbaem yóm beng hilol syudaden, ne deng gotu hensidekem yó kem gónóhen tehe gel heklung bè yó kem hohonen.

⁴¹ Kdéen tau mius, gotu hemnagaw du yó kem kimuhen. Gotu knuli yó kem dumuhen sebét.

⁴² Mom hegmoem yó kem hohonen, tey kehefligalem kul.

⁴³ Lemwót béléem gónón là bud hyu yó kem ngomen sfatay. Yó gónón là gemmò bè yó kem hohonen.

⁴⁴ Deng kóhem béléen yóm gel nogoten mò ilô yóm kegetahen, ne deng gotu lugodem ta tonok yóm gónón myón kmukum.

⁴⁵ Deng mom htuhahem igoen lomi tau. Tey sidek kehyakem du.

Kni le tóbóng bè Dwata anì lenwaen lu

⁴⁶ Ó Dwata, tódô hlós ne kô yóm kehebnosem kum? Kegenen de yóm alì ksidek kkinì kuluhem bélê me?

⁴⁷ Hendemem dé yóm tey kukol klowilu. Hendemem yóm tehe kmoem kum, oluhem kum tau gel matay.

⁴⁸ Laen kô dù tau tódô hlós mowil ke là matayen. Là kô gbeken hemseng du ke sut béléen yóm hatay.

⁴⁹ Ó Dwata, nô se yóm tehe gel nmoem bélê me, yóm gónón gel gfan yóm kbong nawahem kum? Gónón nô se yó kem tehe fasadem ke Dabid?

⁵⁰ Béem klifót yóm tey kehnê le dou yó kem tau, yakà ou du yóm gel tóbóng lówóhem. Tey kehbalahu du yóm gel kehtolo le dou yó kem tau laen dù ketngón le kóm.

⁵¹ Hono hohonem, Dwata, yó kem tau hemnê yóm tau hol geta deng nélékem. Kihu gónón e solu, tendo hennê le.

⁵² Hol bê tekuy lensón yóm kdóyón tekuy ke Dwata yóm hol gónó tekuy mogot. Hono tahu se yóm utóm lingónu ni.