Kem Lingón 88 - Udél Dwata: Gna Kesfasad ne Lomi Kesfasad

Lingón Himan yóm tau sfu Isra

¹ Ó Dwata yóm Dwata lemwà dou, tey knihu béléem, tódô senflósu kdaw ne kifu.

² Hol hnungolem yóm knihu, ne hol henklinguhem yóm alì kehtóbóngu béléem.

³ Abay se deng tey dê gfau bè klowilu, ne tey moni béléu hatay.

⁴ Hol lómón kmò le dou, lómón ke yóm tau deng matay, lómón ke yóm tau laen dù bud tmóbóng du.

⁵ Deng tódô bayà le ou matay. Lómón ke ou yóm tau deng hnatay le nô lem lebeng, yóm tau deng tódô klifótem, yóm tau là buden gomong bè yóm tóbóngem.

⁶ Lómón ke deng lenesem ou etu lem sol lebeng alì nelem, lem tum sol nelem alì kmifu.

⁷ Tey gnómu yóm alì ksidek keblaten yóm kebutem dou, hol lómón lewók mohin tódô slulun etahu.

⁸ Deng mom hlayukem béléu yó kem weu. Denge tey sidek bélê le. Denge gholot, laen dù lanu gewà.

⁹ Tódô kmefen ketngelu lemwót bè kkiku. Tódô ket kdawu htóbóng béléem, Dwata. Hdau eta hólólu bè yóm kehkoduhu béléem.

¹⁰ Deng wen kô kem hentaw ton nmoem bè yó kem tau deng matay? Gbek le bud btik kô anì dóyón le uu?

¹¹ Sentulón le ditu lem lebeng kô yóm là konol yóm kbong nawahem? Ditu bè gónó meglà, gbek le semtulón du kô yóm tey ktenebem bélê le?

¹² Gfan lem yóm gónón kmifu yó kô yó kem hentaw ton nmoem? Sentulón le ditu kô yóm ktedengem bè yóm benwu deng gotu klifót le kdéen? Là.

¹³ Ó Dwata, tey kehtóbóngu béléem, tódô ket hlafusu mni béléem.

¹⁴ Moen de ke deng kenbéem ou, Dwata? Moen de ke knogolem ou?

¹⁵ Nbut bè kegenu ngà, sónmou tendo gemnóm des, ne denge tô gel matay. Là bud hol gbeku du ne yóm keblaten yóm ktafakem dou.

¹⁶ Tey sidek keglumfaku du yóm kebutem dou. Tey kehsideken dou yóm tafakem.

¹⁷ Yóm lebutem, hol lómón tô yóm dunuk smibut dou seflós kdaw. Laen dù lanu gewà.

¹⁸ Deng gotu hlayukem béléu yó kem dumuhu swè ne yó kem tau kenbong nawahu. Hono kifu yóm tebel béléu.