Kem Lingón 86 - Udél Dwata: Gna Kesfasad ne Lomi Kesfasad

Kni Dabid bè Dwata

¹ Ó Dwata, hol hnungolem ou, ne hol bnalaem ou, abay se laen kô dù gmou, ne laen dù kgisu.

² Nofinem ou, yakà gotu nawaw kóm. Lenwaem ou, yóm tau tóbóng lówóhem, yóm tau smalig kóm. Uu se yóm dou Dwata.

³ Hol knoduhem ou, Dwata, yakà senflósu du kdaw tendo tmaba ebéléem.

⁴ Hol benlayem ou kligal, Dwata, yakà ebéléem du tendo gónóhu e mni.

⁵ Tey kehyuhem, Dwata, ne mahil béléem hmifót salà, ne tey kbong nawam kul yó kem tau htóbóng béléem.

⁶ Hol hnungolem yóm knihu, Dwata, hnungolem yóm tey kehkoduhu béléem.

⁷ Bè yóm kdaw wen gónóhu glayam, tmabahe ebéléem, abay se gel bnalaem ou.

⁸ Laen kô dù dwata kéng gemsenged kóm, Dwata. Laen dù bélê le gembek mò hentaw ton lómón yóm kóm.

⁹ Kdéen tau bè yó kem benwu deng nmoem, angat le gotu mógów ebéléem, ne heglaan le bè soluhem, Dwata. Angat dóyón le yóm kegetahen ne yóm klaen dù belen yóm kóm boluy.

¹⁰ Yakà uu du yóm hol gembek, gbekem mò du yó kem hentaw ton. Tek sónen uu yóm Dwata.

¹¹ Tolokem dou, Dwata, yóm nóyô hmoem dou, anì galake bè yóm hol ktahuhen lemwót béléem. Tnóbóngem ou mimón kóm anì wen klikou kóm.

¹² Tódô hotuhu nawahu dmóyón kóm, Dwata yóm dou Dwata hol gónó mogot. Laen kô dù sónen kdóyónu du yóm kóm boluy,

¹³ abay se tey kbong nawahem dou. Deng lenwaem ou gu lem hatay.

¹⁴ Ó Dwata, wen kem tau alì heklabak mundug dou, kem tau hono sidek nmò le, kóyô le ke hnatay le ou. Ni kem tau ni, là kenmón le kóm.

¹⁵ Okóm yóm uu, Dwata, teyi kmodu, ne tey minggel nawahem, là mahili lembut. Yóm kbong nawahem kum, là kóen monol, ne teyi teneb bélê me.

¹⁶ Beklili dou edini, ne hol knodum ou. Hekgisem ou, yóm tau tóbóng lówóhem. Hol lenwaem ou, abay se nimónu uu hol mkél bè yóm kimón tehe yê kóm.

¹⁷ Hegfanem dou kun ilóen yóm kehyu nawahem ebéléu, anì ton yó kem tau kmutó nawa dou, ne angat le bud mulék myak. Abay se uu, Dwata, yóm gel tmóbóng dou ne gel hemyu nawahu.