Kem Lingón 85 - Udél Dwata: Gna Kesfasad ne Lomi Kesfasad

Lingón yó kem sfu Kura

¹ Ó Dwata, deng tódô kokem eta yóm tonokem yóm tóbóng là deng wen hnikót mton du. Deng bud hen-gulékem klowil me mi kem tau Israél.

² Deng gotu hnifótem salà yó kem kóm tau. Tahu se, deng gotu kóhem bélê le kdê salà le.

³ Là bud lenbutem kul ne. Laen dù sfuhen yóm tey sidek kebutem.

⁴ Bud hesfulékem mi ebéléem, Dwata yóm Dwata gel lemwà kum. Hol klifótem ne yóm kebutem kum.

⁵ Laen dù sónen ne kô yóm alì kebutem kum? Là buden teflok ne kô yóm kebutem kum efet kól bè yó kem lugod me?

⁶ Bud hnomihem mi anì bud me hligal ebéléem, mi kem kóm tau.

⁷ Hegfanem kum, Dwata, yóm kbong nawam là monolen, ne hol lenwaem mi.

⁸ Tey khungolu du ke tedu yóm udél Dwata yóm Dwata hol gónó me mogot, abay se fasaden tekuy kem kun tau yóm kenek nawa, syan ke là bud tekuy semfulék ebè yó kem sidek tehe nmò tekuy.

⁹ Bè ktahuhen, là buden legen ne kehewà Dwata yó kem tau wen klikò le du, anì gfan bè klamang benwu tekuy yóm tey keslinang Dwata.

¹⁰ Deng le slomong ne yóm kbong nawa là monolen ne yóm ktahuhen. Deng le sebkes yóm tedeng ne yóm kenek nawa.

¹¹ Ne yóm ktahuhen, lómón ke hesut gu lem tonok, ne hligal hménég elaan se yóm tey ktedeng Dwata ditu bè longit.

¹² Tahu se, tódô kok Dwata ebélê tekuy yóm kun tóbóng, ne angat tey tembas yó kem tonok tekuy.

¹³ Eles tukô gna ke Dwata yóm kun ktedeng mò hemtifes yóm lanen.