Kem Lingón 83 - Udél Dwata: Gna Kesfasad ne Lomi Kesfasad

Lingón Asaf

¹ Ó Dwata, béi tódô htinof kut, béi tódô neb, béi là hekmón, Dwata.

² Là gungolem du kô lendel yó kem hohonem? Là tonem du kô nmò yó kem hohonem, kem tau alì heklabak?

³ Deng nitung le yó kem kóm tau, sidek atul le eta yó kem tau kenbong nawahem.

⁴ Yó udél le, “Géhél ye ne, sulék gotu genlà tekuy yóm kdéen tau Israél anì laen dù bud hemdem du ne yóm boluy Israél yó.”

⁵ Deng ssotu atul le, ne deng le gotu segmung bè yóm kundug le kóm.

⁶ Lu se yó kem tau Idom, ne kem sfu Ismaél, ne kem tau Muab, ne kem tau Hagrayt,

⁷ ne kem tau Gibalayt, ne kem tau Amunayt, ne kem tau Amalikayt, ne kem tau lemwót bè Flistya ne Tayal.

⁸ Deng gmung bélê le Asirya snéen, mung le bè yó kem semfu gu bè Lat.

⁹ Hol nmoem bélê le yóm tehe deng nmoem bè yó kem tau Midyan, ne hol lómón yóm deng tehe nmoem bè Sisira ne bè Jabin ditu bè Él Kisun.

¹⁰ Deng genlaem lu bè benwu Indor, gotu le lagas bè yó mò habù tonok.

¹¹ Gotu hnatayem yó kem tau malak kul lómón yóm deng tehe nmoem bè le Urib lewu le Siib. Gotu hnatayem yó kem ngà yóm tau hol geta bélê le lómón katay le Siba lewu le Salmuna,

¹² yakà deng mon le du, “Nled tekuy yó kem tonok deng nfun Dwata mò gónó tekuy hótób ógóf.”

¹³ Ó Dwata, lómón ke kfung nyuf lenos kmoem kul, ne lómón ke kafa halay nyuf lenos.

¹⁴ Lómón yóm ofi mken lem dlag, ne lómón ke kutu ofi lemtom gu lem bulul,

¹⁵ gotu lohem lu, hógówem ebélê le yóm tey lenos alì kemgis mò hmikò kul.

¹⁶ Hol henyakem lu efet le heglaan béléem.

¹⁷ Béem nmò sónen yóm kyak le ne yóm klikò le. Balù nô nmò le, béem abay nmò gónón e kól

¹⁸ anì tngón le tek sónen uu Dwata, ne tek sónen uu yóm Hol Dandónen Geta mogot klamangen benwu.