Kem Lingón 80 - Udél Dwata: Gna Kesfasad ne Lomi Kesfasad

Lingón Asaf

¹ Ó Dwata, hol hnungolem nim taba me ebéléem, yakà uu du yóm gel semgyok yó kem tau Israél. Hol hnungolem mi, yakà uu du yóm gel tukô gna kum. Dengi myón bè yóm gónóm myón kmamal geta senta yóm gónó le gel nô yó kem gel hógówem.

² Hol hegfanem bè yó kem sfu Ifraim, ne sfu Bindyamin ne sfu Manasi yóm tey keslinangem. Hol htonem kum yóm kegbekem, géhél lenwaem mi ne.

³ Ó Dwata, bud hulékem mi ebéléem. Hol knoduhem mi, són se bè yó gónó me gewà.

⁴ Ó Dwata yóm Dwata laen dù là gbeken du, yóm hol gónó me mogot, kegenen de duen yóm là bud kebutem kum anì hnungolem yóm kni me ebéléem?

⁵ Tey sidek kehlóngónem kum nim kmoen ni, lómón ke yó henged tendo ken me. Ne yóm lewok me bè yóm gel kkik me, lómón ke yó henged tendo ninum me.

⁶ Deng gotu hlusem yó kem dumu benwu hmilol kum anì sen-gled le yóm tonok me. Tey kehnê le kum yó kem hohon me.

⁷ Ó Dwata, bud hulékem mi ebéléem. Hol knudungem mi, són se bè yó angat gónó me gewà.

⁸ Bè yóm tehe kwitem kum hewà gu bè Idyip, lómón ke wen hulu lemfà nitem gu ditu. Gotu hdóhem yó kem tólóng tau là hemtahu le béléem, ne huluhem bè tonok le yóm hulu lemfà yó koni.

⁹ Deng tehe eles hen-gifatem yóm gónóm angat mulu du. Tey nelem kdolilen yóm huluhem yó, ne tódô lenngeben klamangen tonok me lefaen.

¹⁰ Tódô golung se yó kem bilil, botong dounen. Ne yó kem hangahen, tódô gnolungen yó kem koyu sidar lembang.

¹¹ Ne yóm lefaen, botong gefet bè mohin Miditiranyan kól bè yóm tey él mayuk boluyen Yufratis.

¹² Moen de, Dwata, ke genbaem labat hilolen yóm huluhem yó? Nénégem ket tau miwes, ket tódô temsob ma bunguhen.

¹³ Yó kem sdô lem bnes, gotu senwól le. Ne gotu le mowil bè yó, yó kem dumu ógóf lem bnes.

¹⁴ Beklili ebélê me, Dwata, yakà uu du yóm Dwata laen dù là gbeken du. Temngeli gu dyó bè longit edini laan bélê me, géhél lenwaem mi kem kóm tau.

¹⁵ Géhél nam e tnóbóng yóm tehe huluhem, igoen tehe tilob ktowoken, lelen mabù.

¹⁶ Gotu nofok yó kem hohon me yóm tehe huluhem yó, ne ntem le. Hol genlaem yó kem hohon me, Dwata, lemwót bè yóm tey kebutem kul.

¹⁷ Hol hlowilem mi kem tau deng nélékem, ne nofinem mi. Yakà mi du yó kem tau tehe hekgisem.

¹⁸ Là kô me na a bud skó béléem, Dwata. Hol hlowilem mi, ne angat tey kdóyón me kóm.

¹⁹ Ó Dwata yóm mogot kum, bud hulékem mi ebéléem, yakà uu du se yóm laen dù là gbeken du. Hol knudungem mi, són se bè yó gónó me gewà.