Kem Lingón 8 - Udél Dwata: Gna Kesfasad ne Lomi Kesfasad

Lingón Dabid yóm kegeta Dwata, ne yóm kehegeta Dwata tau

¹ Ó Dwata, yóm hol gónó me mogot, deng tey gfan bè klamangen benwu yóm alì kegeta yóm boluyem Botong gefet ditu ta yó kem longit seglafin yóm tey keslinangem.

² Gbót dóyón le uu yó kem ngà lemnek kkólen bè yó kem ngà tolo hebon. Mlan bè yóm kul kdóyón kóm gónóm hemseng yó kem tau gel hmohon kóm. Laen kô dù gmò le béléem.

³ Ke gele lengalà ebè longit yóm deng tehe nmoem, tonu yóm bulón ne yó kem blotik deng eles mdengen gónóm hemsù kul.

⁴ Ke hendemu yóm deng nmoem yó, le hilu he kun yó kem olo tau tonok. Kiholen yóm tey nawahem ebélê le.

⁵ Bè yóm tehe kifilem tau, tek udì yóm gónóm là hsenged du béléem. Deng tey kehegetahem du, ne tey kadatem du.

⁶ Deng gotu sigangem tahen yóm kentihen

⁷ yó kem ógóf gel tnomò, ne yó kem ógóf gel nô lem bnes,

⁸ ne kdéen móyóng te kmawang, ne kentihen nô lem él, ne kentihen nô lem mohin deng gotu sigangem tahen yóm kentihen.

⁹ Ó Dwata, uu se yóm mogot kum. Tey gfan bè klamangen benwu yóm kegetahem.