Kem Lingón 79 - Udél Dwata: Gna Kesfasad ne Lomi Kesfasad

Lingón Asaf

¹ Ó Dwata, deng nled yó kem tau là hemtahu yóm tonok kóm nfun. Deng gholu le yóm kóm Gónô, deng genbà le Jirusalim.

² Yóm lówó yó kem tóbóng lówóhem deng matay, deng gotu tebel le mò tnukô yó kem onuk koyu mken matay, ne hken le unged yó kem kóm tau bè yó kem ógóf lem bnes.

³ Yóm kul litô yó kem kóm tau lómón ke él mlel bè klamang Jirusalim, ne laen dù tau tebel mò lembeng kul.

⁴ Deng hennê le mi yó kem tólóng benwu hmilol, knuli le mi, lel le semdekà kum.

⁵ Ó Dwata, kegenen de yóm kebutem kum? Laen dù tul sónen ne kô? Yóm kélés nawam, kegenen de kkalen lómón kal ofi?

⁶ Kokem eta yó dé kem benwu kembê kóm yóm kebutem yó, eta yó kem tau là tmaba ebéléem.

⁷ Yakà deng gotu hnatay le yó kem kóm tau Israél, ne deng genbà le yóm kul benwu.

⁸ Béem abay hbô kum yó kem salà nmò yó kem tehe fù me. Hol géhél knoduhem mi, laen dù bud nefet nawa me ne ni.

⁹ Hol tnóbóngem mi, Dwata yóm Dwata gel lemwà kum. Tnóbóngem mi mò gónóm gboluy. Lenwaem mi, ne hnifótem kum salà me anì holi megdóyón.

¹⁰ Moen du ke bayaem lu mudél yó kem tau bè tólóng benwu, yó kem tau là temngón kóm, yó udél le, “Nô se Dwata le du?” Hegfanem bélê me yóm kbelesem kul bè yóm khatay le yó kem tóbóng lówóhem.

¹¹ Hol hnungolem yóm dolong yó kem kóm tau deng negef. Móyón hnatay le lu, géhél lenwaem lu mlan bè yóm tey kegebekem.

¹² Ó Dwata, hitu dulékem meles kul yó kem tólóng benwu hmilol me alì hemnê kóm.

¹³ Duhen yó, laen dù tul sónen yóm tendo kdóyón me kóm mi kem kóm tau, yó kem ubiha gel hótóbem. Dóyón me uu efet kól bè yó kem hilu bud lugod me.