Kem Lingón 78 - Udél Dwata: Gna Kesfasad ne Lomi Kesfasad

Lingón Asaf

¹ Ó kem dou tau, hol hnungol ye yóm toloku kuy. Henklingu ye yó kem tulónu kuy.

² Yakà hlanu du bè hlingón yó kem tulónu kuy. Tulónu kuy yóm gebnos bélê tekuy là sekna,

³ kem tutul deng gel gungol tekuy ne tngón tekuy, yóm deng gel tulón le tekuy yó kem fù tekuy.

⁴ Bê tekuy abay bnos bè yó kem ngà tekuy nim ktahuhen ni. Okóm hol tulón tekuy bè yó kem bud lugod tekuy yóm tey knóón deng nmò Dwata. Tulón tekuy yóm tey kegbeken ne yó kem tey hentaw ton deng nmoen.

⁵ Wen hloloen ke tehe Jakub, wen hlau hloloen yó kem tau Israél. Hloloen yó kem fù tekuy anì hol bud tolok le bè yó kem ngà le yóm hlauhen kul yó,

⁶ anì bud tngón yó kem lugod le, balù yóm ngà là dengen sut he, anì bud lu tmolok du bè yó kem kul ngà.

⁷ Mlan bè nim ni, són Dwata ne nefet nawa le, ne là kô klifót le du yó kem deng nmoen bélê le, okóm tendo nimón le yó kem hlauhen kul yó.

⁸ Ke lómón ni, là mkél le bè yó kem fù le, kem tau mgel kulu, ne là nimón le ke Dwata, là mbegelen yóm klolò le ke Dwata, ne là kô le teneb béléen.

⁹ Yó kem sendalù sfu Ifraim, deng gotu nogot le boho le ne hanak le, okóm timbow le kól bè gónó sgida, gotu le mlóy semfulék.

¹⁰ Là kô lolò le du yóm deng senfasad le Dwata, ne kenbê le yó kem kun hlau kul.

¹¹ Deng klifót le yóm deng nmò Dwata, yó kem tey hentaw ton deng hegfanen bélê le.

¹² Tey wen hentaw ton tehe nmò Dwata bè yó kem fù le bè yóm tehe knô le bè Idyip bè datal Suan.

¹³ Senkóhen bè gónón sóól yóm mohin anì gotu le mlan lemen, ne tódô segbusung eta yóm él lómón ke mdà beng.

¹⁴ Ke kemdaw, nalaken lu mlan bè lobun, ne ke kifu, nalaken lu mlan bè yóm nóng ofi tukô gna kul.

¹⁵ Heskangen yó kem botu bè yóm benwu laen hol wen tauhen mò gónón hesut yóm tey él mò ninum le, hol lómón kmoen sfut él.

¹⁶ Wen él mlel hesfuten gu bè botu, ne yóm lel yóm él yó hol lómón ke lówó él.

¹⁷ Okóm yó kem fù tekuy, mom henlós le mò salà, là kô nimón le du yóm Hol Dandónen Geta bè yóm benwu laen hol wen tauhen.

¹⁸ Tnilów le Dwata bè yóm kni le yóm ken nóyô le.

¹⁹ Yó udél le eta Dwata, mon le, “Là kô gbek Dwata bemlay tekuy ken bè nim benwu là hyu menwu du ni.

²⁰ Tahu se gbeken heskang botu anì wen él semfut gu lemen, okóm là kô gbeken du bemlay ken ne utón bè yó kem kun tau.”

²¹ Bè yóm kungol Dwata du yóm udél le yó, ya tey sidek kebuten. Yó gónón hemwit ofi ebè yó kem sfu Jakub, mkal yóm kebuten bè yó kem sfu Israél,

²² abay se là kô hentahu le ke Dwata, ne là kô snalig le du yóm kesegyoken kul.

²³ Balù yó he, dóken longit anì hnas,

²⁴ hkulónen mana mò ken le. Wen ken blayen kul gu bè longit.

²⁵ Ken le yóm kul gel ken yó kem hógów Dwata nô bè longit, ngang le mken efet le bsow.

²⁶ Hwit Dwata yóm lenos lemwót fi dmata kdaw, ne mlan bè kfasangen hesuten yóm lenos lemwót fi leged.

²⁷ Hwiten yó kem tey utón lómón kwen le kfung, hwiten kem onuk móyóng, lómón kwen le helek bè kilil mohin.

²⁸ Hdefen lu lem kamfù le, ne gu hilol yó kem tolda le.

²⁹ Ngang le mken efet le gemtu, abay se monem, blay Dwata kul yóm nóyô le.

³⁰ Okóm yóm igò le tolo mken du nim utón ni, igoen tolo nô lem bak le,

³¹ msut bélê le yóm tey kebut Dwata kul, tey wen hnatayen bè yó kem logi alì kemgis bélê le. Hnatayen yó kem logi lomi lemnok bè yó kem tau Israél.

³² Okóm balù yó he, tódô senflós le mò salà yó kem tau. Balù yóm deng kton le du yó kem hentaw ton deng nmò Dwata, là kô hentahu le du.

³³ Yó gónóm mon, kendel lensón Dwata yóm klowil le. Yóm klawi le tolo mowil, senflósen tendo wen knikò le.

³⁴ Tikóng wen hnatay Dwata bélê le, yó he kebel le ke Dwata yó kem dù tau mowil. Hegsel le, ne bud le semfulék ebè Dwata.

³⁵ Yó he kegtulón nawa le du Dwata se yóm henged botu gónó le gel hofin, du se yóm Dwata Hol Dandónen geta deng msok kul.

³⁶ Okóm són te kulit le néen yóm klolò le du, mò le kéng béléen.

³⁷ Là bud le teneb béléen. Là dnohò le du yóm deng senfasad le Dwata.

³⁸ Okóm balù yó he, tey kkodu Dwata kul, hnifóten salà le, ne là kô genlaen kul. Tey dê duléken ne mafas du yóm kebuten kul, là hesuten du yóm alì sidek kebuten kul.

³⁹ Abay se hendemen olo le tau tonok se kul, là kóen té klowil le, lómón ke lenos, tek suléken mbel, là kô bud tngónem du.

⁴⁰ Deng hilu dulék le ne là mimón ke Dwata bè yóm benwu laen hol wen tauhen, ne tendo heblat le nawahen bè yóm benwu laen hol wen tauhen.

⁴¹ Ket kiwól le tendo tmilów ke Dwata, ket kiwól le tendo heblat nawa yóm Dwata laen dù belenen bè Israél.

⁴² Là bud hendem le du yóm tey kfasangen, duhen yóm tehe kehewaen kul bè yó kem hohon le.

⁴³ Deng klifót le yó kem tey tennga tehe nmoen bè Idyip, yó kem hentaw ton tehe nmoen bè yó bè datal Suan.

⁴⁴ Yóm tehe kehbaling Dwata du litô yó kem él mlel bè Idyip, anì laen dù bud él ninum le yó kem tau Idyip.

⁴⁵ Yóm tehe keheglumfaken du bélê le yó kem tey lenged wen mò hmayam kul, ne yó kem tey fak wen mò gemlà kul.

⁴⁶ Yóm keheglumfaken du kul yóm hol yéen tlangas lememek bè benwu le mò hemsidek yó kem hulu le ne yó kem tbas le.

⁴⁷ Gotu hensideken yó kem bungu grép le hlanen bè yóm tey bulók kulón. Ne gotu hensideken snéen kdê yó kem koyu sikamor le hlanen bè yóm kulón gedlug ketnawen.

⁴⁸ Gotu hfatayen snéen yó kem safì le mlan bè yóm bulók kulón yó, ne hekfóen leték yó kem dumu ógóf le.

⁴⁹ Lemwót bè yóm alì ksidek kebuten yó kem tau Idyip, wen kem hógówen gu bè longit mit hatay mò gemlà kul.

⁵⁰ Là bud nafasen du yóm alì ksidek kebuten kul. Là kô lenwaen kul bè yóm hatay le, okóm gotu hfatayen lu mlan bè yóm des mit hatay hwiten elem blóng le.

⁵¹ Gotu hfatayen yó kem ngà le logi twogu yó kem tau Idyip, kem ngà alì mebtes bélê le, hfatayen lu bè klamangen benwu Idyip.

⁵² Okóm yó kem kun tau, fen nalaken lu lómón kem ubiha, nalaken lu hlalak yóm benwu laen hol wen tauhen.

⁵³ Laen kô dù hemen le bè yóm kesgalaken kul yó, yó gónó le là likò. Okóm yó kem hohon le, gotu le lemneb lem mohin.

⁵⁴ Nalaken yó kem kun tau ebè yóm kun tonok, ebè yó kem bulul lemnek deng gutahen mò blayen kul.

⁵⁵ Deng gotu lohen yó kem tau tehe nô bè yóm benwu yó. Nólólen yóm tonok le mò blayen yó kem tau Israél mò nfun le. Ne bè yó gónón hemsù kul yó kem tau Israél.

⁵⁶ Baluen ke lómón yó deng nmoen bélê le, sana ktilów le du he yóm Dwata Hol Dandónen Geta. Sana là kimón le du, là móyô le mimón du yó kem hloloen kul.

⁵⁷ Deng mom knogol le, mkél le bè yó kem tehe tuha le. Hol le mkél bè boho sigol, là gsaligem du.

⁵⁸ Deng hefebut le Dwata mlan bè yóm kehdà le yó kem gónó demsù ebè yó kem dwata kéng. Tey khélés le nawahen bè yóm ktaba le ebè yó kem dwata lennged nmò le.

⁵⁹ Tikóng gungol Dwata yóm nmò le yó, ya tey sidek kebuten kul, ne sulék kenbéen lu yóm kdê le yó kem kun tau Israél.

⁶⁰ Botong tebelen yóm gónô gónóhen nô lem blóng le bè Silu. Tebelen yóm gónô gel nit le mógów gónón nô lem blóng yó kem kun tau.

⁶¹ Lusen yóm Slungan Fasaden anì negef yó kem hohonen, yóm Slungan ilô yóm kfasangen ne keklóónen.

⁶² Lemwót bè yóm alì kebuten kul yó kem kun tau nfun, lusen lu matay bè sudeng.

⁶³ Gotu le matay bè gida yó kem ngà le logi lomi lemnok, yó gónón laen dù bud yehen yó kem sawang libun le.

⁶⁴ Matay bè sudeng yó kem tau gel blóng le ebè Dwata, ne là hlus le kul ke lenangag le lu yó kem yehen le deng bolu.

⁶⁵ Omin Dwata yó he hetngón, lómón ke tau lomi btik, hol lómón kmoen yóm tau lóbô deng btik bè klengelen.

⁶⁶ Gotu hlóyen lu mulék yó kem hohonen, ne laen dù tul sónen yóm tey kehyaken kul.

⁶⁷ Okóm kenbéen yó kem sfu Jusif, ne là se néléken du yó kem sfu Ifraim.

⁶⁸ Deng mom néléken sfu Juda, dalang se yóm Bulul Sayun yóm hol kenbong nawahen.

⁶⁹ Bè yó gónón hefdà yóm Gónóen alì geta, lómón kbegelen yóm tonok laen dù tul ksideken.

⁷⁰ Néléken Dabid yóm tóbóng lówóhen, tnabahen gu bè yóm gónón semgyok ubiha.

⁷¹ Nwahen Dabid gu bè yóm gónón semgyok yó kem ubiha libun wen ngà le, nmoen mò semgyok yó kem sfu Jakub, yó kem tau Israél hol kun nfun Dwata.

⁷² Tey hyu kesegyoken kul, abay se hol lemwót bè nawahen, ne tey tilob kesgalaken kul.