Kem Lingón 77 - Udél Dwata: Gna Kesfasad ne Lomi Kesfasad

Lingón Asaf

¹ Tey ktabahu ebè Dwata, tey ktabahu du anì gungolen ou.

² Bè yóm tehe kdawen wen hlayamu, hnebelu Dwata. Suloyu buteng mni ebéléen igou hdà hólólu ebè longit. Laen kô dù kligalu ke là wen tóbóng lemwót gu béléem.

³ Hendemu Dwata, ne botonge dmolong lanu hfu imaku tendo mangat yóm któbóngem dou.

⁴ Là hegtungóem dou, Dwata, tey sbeweg kegnómu du, botong là gbeku du bud mni ebéléem.

⁵ Tendo hendemu yóm tey kehyuhen yóm gnan kdaw, bè yó kem tehe halay gnan ekni,

⁶ yóm tey gel kehligalu semngal kifu. Tey kehedemu du yóm gónón stólóng nim kmoen ni.

⁷ Laen dù tul sónen ne kô yóm kekbê Dwata dou? Là buden hligal béléu ne kô?

⁸ Yóm tehe kbong nawan dou là monolen, laen duen ne kô? Yó kem tehe fasaden dou, laen duen ne kô?

⁹ Deng klifót Dwata ne kô yóm tehe kehyu nawan ebéléu? Laen kô dù bud koduhen dou ne kô lemwót bè alì ksidek kebuten dou?

¹⁰ Ne yó hendemu, “Ni deng tngónu. Gehedemu ne yó kem tehe halay alì kekgis yóm sigel kwanan Dwata, sigel kwanan yóm Dwata Hol Dandónen Geta.”

¹¹ Gehedemu yó kem tehe nmò Dwata. Gehedemu yó kem tey hentaw ton tehe nmoem bè gnan kdaw ekni.

¹² Senflósu hemdem du yóm kdê deng tehe nmoem. Là mkóhen bè nawaw yó kem tey tehe genbekem.

¹³ Laen kô dù belenen yóm kóm klan, Dwata. Laen dù dumu dwata gemsenged yóm tey kegetahem.

¹⁴ Uu se yóm Dwata mò du yó kem tey dê hentaw ton. Deng hegfanem bè yó kem tólóng tau yóm tey kegbekem.

¹⁵ Deng tehe nsokem yó kem kóm tau lemwót bè yóm tey kekgisem, lu se yó kem tau sfu tehe Jakub ne sfu tehe Jusif.

¹⁶ Bè yóm tehe ktonen kóm yóm Mohin Hulô, Dwata, ya tey sidek klikoen, botong meningkil. Botong megsinsig bè yóm hol huheden lemwót bè klikoen.

¹⁷ Ya tey kulón gu bè yó kem lobun. Ya tey leték gu bè longit, mung du yóm tey kal silà tódô setles.

¹⁸ Lel ni letékem mkal lem klifus bong. Hlayagen klamangen benwu yóm tey kal silaem. Lemwót bè yóm tey linol bong, botong megsinsig tonok.

¹⁹ Nifalem yóm tey mohin lamang, mlani lem blóng yóm tey lewók bong, bede laen dù mton du danà hólól tihem.

²⁰ Tehe nalakem yó kem kóm tau bè yóm lan yó, hol lómón kalakem kul ubiha, bede hlanem bè le Musis lewu le Aron.