Kem Lingón 76 - Udél Dwata: Gna Kesfasad ne Lomi Kesfasad

Lingón Asaf

¹ Tey tótól Dwata bè benwu Juda. Tey megdóyón boluyen bè benwu Israél.

² Bè Jirusalim gónóhen nô, nô ta bè bulul Sayun gónóen.

³ Bè yó gónón gotu temfok du hanak yó kem hohonen, kkólen bè klung le ne kem sudeng le, dalang se yó kem dumu ngom le sfatay, gotu tenfoken bè yó.

⁴ Teyi knóón, Dwata. Teyi geta senta yó kem bulul là sekna.

⁵ Yó kem sendalù hohon me alì lóbô, deng gotu negef me yóm kdê nô bélê le, yakà deng le gotu matay yóm kdê le. Laen dù bélê le gembek hemsidek kum.

⁶ Ó Dwata tehe Jakub, lemwót bè kbólówem kul gónó le gotu matay, yó kem tau smakay kudà dalang se yó kem kudà le.

⁷ Teyi bong knikò, Dwata. Tau du de gembek mdà bè soluhem ke bangem lembut?

⁸ Lemwót bè longit yóm kkukumem yó kem hohonem, botong le likò yó kem tau bè klamangen benwu, tódô le yem bè soluhem.

⁹ Dengi mdà, Dwata, mò kmukum yó kem tau gel mò sidek, ne mò lemwà yó kem tau hen-gnok talak tonok.

¹⁰ Yóm kebut le kóm yó kem tau, yó se sotu hol gónóm megdóyón. Yóm kebut le kóm yó, mò sudengem tmafak tau.

¹¹ Mò ye fasad bè yóm sana kuy Dwata hol gónó mogot, ne hol dnohò ye yóm fasad ye yó. Yu kem kdéen tau bè kem benwu hmilol, hol ye mit basa ebè Dwata yóm Dwata hol knikò.

¹² Sal gel heglaan Dwata yó kem ngà tau hol geta hegeta knô, ne du se knikò yó kem tau hol geta bè klamangen benwu.