Kem Lingón 75 - Udél Dwata: Gna Kesfasad ne Lomi Kesfasad

Lingón Asaf

¹ Slamat me ebéléem, Dwata, tey keslamat me béléem, yakà teyi moni bélê me. Gotu tulón yó kem tau yó kem tey hentaw ton deng nmoem.

² Yó monem, “Deng wen buteng fétu mò butengu kmukum yó kem tau gel mò sidek. Knukumu lu mlan bè ktedengen.

³ Ke megsinsig tonok, ne gotu le likò yó kem tau, botong le kenkel, ou se hol hbegel du yó kem hehek begel tonok.

⁴ Yó udélu ebè yó kem tau heklabak, monu, ‘Bê ye abay bud heklabak.’ Ne ebè yó kem tau mò sidek, monu, ‘Bê ye abay bnantak Dwata,

⁵ botongen ne yóm kbantak ye du. Ne tenflok ye ne mò du yóm stulón hton salù.’ ”

⁶ Yóm kkukum tau, là lemwóten fi dmata kdaw duhen ke fi desdef, ne là se lemwóten fi bwak duhen ke fi leged, ne là se lemwóten bè yóm benwu laen hol wen tauhen.

⁷ Kaem tek són Dwata yóm kmukum tau. Du se temngón du yóm tau wen salaen, ne bud tngónen snéen yóm tau laen dù salaen.

⁸ Yakà wen tegayan nogot Dwata, tódô hnok yóm ninum alì lóbô deng kmodok nô lemen, hningónen yóm alì kebuten. Gotu twélen nim ninum ni ebè yóm kdéen tau mò sidek, hinumen kul efet gotu le.

⁹ Okóm béléu, tendo heglalagu yóm deng nmò Dwata. Sngalu ebè yóm Dwata yó kem tau Israél yóm sngal dmóyón du.

¹⁰ Yakà deng mon Dwata du, “Kóhu yóm kul kfasang yó kem tau mò sidek, okóm bè yó kem tau tedeng kmò le, tennuu yóm kfasang le.”