Kem Lingón 73 - Udél Dwata: Gna Kesfasad ne Lomi Kesfasad

BOK 3 Kem Lingón 73—89 Lingón Asaf

¹ Tey hyu nmò Dwata bè yó kem tau Israél, bè yó kem tau laen dù boolen yóm knawa le.

² Okóm yóm dou, tehe tek udì duen gónóhen tô lana yóm kgel nawahu ke Dwata, deng tô lana kehtahuhu béléen

³ lemwót bè yóm alì sidek kélés nawahu yó kem tau hegeta le knô le. Tódô tonu laen dù kat gónón sidek klowil le se kul yó kem tau gel mò sidek.

⁴ Laen dù des sut bélê le. Tey le kemgis, ne tey hyu klówó le.

⁵ Laen dù gónó le glayam lómón yó kem dumu tau, ne laen se dù blat nô ta le.

⁶ Yó gónóm mon, tendo gfan bélê le yóm kehegeta le knô. Deng le mom heklabak bè yóm ksidek nmò le bè kem dumu tau.

⁷ Hono sidek yóm gel btang bè sumóng le, ne sónmò le hemdem matul mò sidek.

⁸ Gel knuli le kem dumu tau, lelen sidek kbak le. Tey sidek kehegmón le, ne sónmò le matul kmò kdà le kul elaan yó kem dumu tau.

⁹ Tey sidek kbak le ebè Dwata snéen yóm Dwata nô bè longit. Ya tey gel kdanda kdók le yó kem tau te tonok.

¹⁰ Balù yó kem kun tau Dwata, botong le gbót hmungol bélê le. Mahil hentahu le yóm gel tulón yó kem tau mò sidek yó.

¹¹ Yó gel udél yó kem tau heklabak yó, mon le, “Là kô tngón Dwata du yóm kut nmò. Yóm Hol Geta yó, là kô glileben du yó kem gel nmò tekuy.”

¹² Yó se kul kmò yó kem tau gel mò sidek. Tey wen gónó le ma, ne sónmoen temnù yóm nô bélê le.

¹³ Ke lómón yó yóm kul klowil, hol lómón tô laen dù ofolen dilóu yóm klaen dù boolen yóm dou knawa, ne yóm klaen dù salà nmou.

¹⁴ Lómón kegnómu du, Dwata, lómón ke hnayamem ou ket kdaw. Ket hlafusem tmafak dou.

¹⁵ Ke deng tehe btang bè sumóngu yóm kehedemu yó koni, là nmou du dilóu yóm kun kmò yóm tau Dwata.

¹⁶ Tey kegenu tô hemnagì du yóm gel tonu bè yó kem tau mò sidek, okóm tey mgel béléu.

¹⁷ Song tngónu mò kmoen, denge husek elem Gónóem, Dwata. Ominu yó he temngón du yóm gónón e kól yóm kul klowil yó kem tau mò sidek.

¹⁸ Yó angat kmoem kul, lómón ke hdaem lu bè yóm gónón alì medel tonok anì tlidus le elem yóm gónó le angat megtafak.

¹⁹ Tódô le kendel meglà, ne tey sidek yóm gónó le e kól.

²⁰ Yóm kul klowil yó kem tau gel mò sidek, lómón ke olo kna. Timbow hlafus là bud tngónem du. Ke tnafakem lu, Dwata, gotu le lana yó kem tau yó.

²¹ Bè yóm tehe kdaw, alì sidek kegnómu du lanen wen kensidek nawahu béléem.

²² Tey là hyuhen tum kehedemu tu, lómón tóe knawa ógóf, laen dù tngónu. Là dog naw hentukul du yóm kóm kmò.

²³ Balù yóm tey tehe ksidek kegnómu du yó, mom henlelu hloni ebéléem. Ne tódô senflósem se mogot dou, lómón ke eles nogotem ou bè sigelu.

²⁴ Yóm kesgalakem dou, sal gel mlan bè yóm gel kehlauhem dou. Bè yóm angat són klowilu, angat hegfanem yóm kadatem dou bè yóm khódóhem dou.

²⁵ Laen dù dumu gónón nô nawahu bè longit, són uu. Senged se bè ni te tonok, laen dù dumu gónón nô nawahu, són uu.

²⁶ Bè yóm tolo klowilu te tonok, là holen bud metlasik ne kehedemu, ne yóm lówóhu, sónmoen minut lunog. Okóm són Dwata gel temgel dou, ne són kun tóbóng ken-gel nawahu.

²⁷ Yó kem tau kmogol nawa kóm, Dwata, angat le gotu matay. Yó kem tau là teneb le béléem, genlaem lu.

²⁸ Okóm béléu, alì hyu gemnóm du yóm kehlonihu ebè Dwata anì naw e heklung béléen, yóm Dwata hol gónó mogot. Tey hyu gemnóm du snéen yóm gel keheglalagu du yóm kdê gel nmoen.