Kem Lingón 72 - Udél Dwata: Gna Kesfasad ne Lomi Kesfasad

Lingón Selumun

¹ Ó Dwata, hol tolokem yóm tau hol geta anì hol tedeng kogoten kukum. Hol tolokem du yóm kóm kmò kogot kukum

² anì tedeng kwiten kul yó kem kóm tau, ne anì tedeng snéen kwiten kul yó kem tau gel hen-gnok le.

³ Yó hnihu béléem, Dwata, anì tilob kógów klowil le yóm kdéen tau knamalen, ne anì tedeng yóm kukum lem blóng le.

⁴ Yake hol nfihen yó kem tau élél, ne tnóbóngen yó kem tau laen dù gónó le ma, anì laen dù gmò le bélê le yó kem tau hemgnok kul.

⁵ Yake bê le tenflok dé, Dwata, tmaba ebéléem yó kem kóm tau bè yóm tolo kwen dù nóng kdaw ne kwen dù nóng bulón. Yake yó se bud gel nmò yó kem tau angat semfu gu bélê le.

⁶ Ke tilob kwiten kukum yóm tau hol geta, hol lómón ke kulón demsù eta yó kem dnadu, ne lómón ke blanas etalak tonok.

⁷ Klawihen mowil, yake tendo temnù ktedengen yóm kogoten benwu, ne yake laen dù sónen yóm kehyu klowil yó kem tau knamalen, lómón yóm klaen dù són yóm bulón.

⁸ Yó kem benwu knamalen, angat lenwóten doli mohin kkólen bè dolin. Bud lenwóten bè él Yufratis kkólen bè són tonok.

⁹ Angat le gotu mtud bukol bè soluhen yó kem tau nô bè yóm benwu laen hol wen tauhen. Angat le gotu lemfen bè soluhen yó kem tau hmohon du.

¹⁰ Yó kem tau hol geta bè kem Kestilà, ne yó kem tau hol geta bè yó kem hungul te mohin, gotu le angat mógów ebéléen na le e benlay basa. Dalang se yóm tau hol geta bè benwu Syiba ne yóm tau hol geta bè benwu Siba, gotu le angat mógów ebéléen na le e benlay basa.

¹¹ Tódô kdéen tau hol geta bè klamangen benwu, angat le gotu mtud bukol bè soluhen. Tódô kdéen tau bè klamangen benwu, angat gotu mimón du.

¹² Gotu lenwaen yó kem tau élél gel htóbóng béléen, yó kem tau laen dù gel kemmón kul.

¹³ Tey kkoduhen yó kem tau lunog ne yó kem tau laen dù gónó le ma. Hlowilen yó kem tau élél.

¹⁴ Lenwaen lu lem tdok yó kem tau hemgnok kul ne hemsidek kul. Tey mebtes béléen yóm kul klowil.

¹⁵ Dwata he hol htahà klowilen yóm tau hol geta bélê me. Yake wen blówón lemwót bè benwu Syiba blay le du. Yake tódô seflós yóm gel kni le béléen bè Dwata yó kem kun tau anì tendo tnóbóng Dwata.

¹⁶ Yake hol hmalay dé yóm tonok bè yóm benwu knamalen, kkólen bè yó kem bulul leneken, yake tódô tfeng hulu. Lómón kehyuhen, lómón yóm tonok gónó le gel mò hulu bè benwu Libanun. Ne yó kem syudad knamalen, yake tódô hnok tau lemen, lómón kwen le, lómón yó kem bnes tmowok.

¹⁷ Yake laen dù kmifót du boluy yóm tau hol geta bélê me, ne anì laen dù tul sónen yóm któtólen, lómón yóm klaen dù tul són yóm nóng kdaw. Yóm kdéen dumu benwu, yake gotu le mni bè Dwata anì tnóbóngen lu, lómón yóm gel któbóngen yóm tau hol geta bélê me.

¹⁸ Hol dóyón tekuy Dwata, yóm kut Dwata kem tau Israél. Tek són du gembek mò kul ni kem hyu hnihu ni koni.

¹⁹ Hol bê tekuy lensón yóm kdóyón tekuy du, abay se tey minggel boluyen. Yake gfan bè klamangen benwu yóm tey klinggelen. Dwata he hol dmohò du nim ni!

²⁰ Ni se sónen yóm kni Dabid bè Dwata, yóm ngà Jisi.