Kem Lingón 71 - Udél Dwata: Gna Kesfasad ne Lomi Kesfasad

¹ Són ebéléem, Dwata, gónów e mlo. Hol béem henyak ou bè là kegmou.

² Lemwót bè yóm tey ktedengem, hol lenwaem ou lem hólól yó kem hohonu. Hol henklinguhem ou, ne lenwaem ou.

³ Hol lómón ke uu yóm botu bong tendo gónóhu e solu mò gónóhu heklung, mò gónóhu hofin. Géhéli mudél anì gewae, yakà són uu du yóm botu gónóhu heklung ne gónóhu hofin.

⁴ Uu se dou Dwata, hol lenwaem ou lem hólól yó kem tau mò sidek, lem hólól yó kem tau laen dù tedeng bélê le, kem tau sidek balu le.

⁵ Són uu, Dwata, yóm nefet nawahu. Són uu yóm tendo snaligu lemwót bè hanà kudiu.

⁶ Lemwót bè ksutu yóm ksaligu kóm. Kewótu lem blutut yê yóm kesegyokem dou. Laen dù sónen yóm tendo kdóyónu kóm.

⁷ Yóm dou klowil, lómón ke mò gónó le temngel yóm kdéen tau, abay se uu yóm mbegel mofin dou.

⁸ Yó se gónóhu là semkas du dmóyón kóm, ne sendawu tmulón du yóm tey keklóónem.

⁹ Ne ni, bè nim deng ktuhahu, béem kó ou. Béem bayà ou bè nim klaen dù bud kgisu.

¹⁰ Yakà deng wen udél le etahu yó kem hohonu. Gotu le stifun, natul hnatay le ou.

¹¹ Yó udél le, mon le, “Deng bayà Dwata ne. Lemwót tekuy kenfô tekuy, abay se laen dù bud tmóbóng du.”

¹² Ó Dwata, hol béi hlayuk béléu. Hetlasik tnóbóngem ou dé.

¹³ Yó kem tau gel tmifù dou yó, hol henyakem lu, hol genlaem lu. Hyu ke gotu le mulék myak yó kem tau móyô hemsidek dou yó.

¹⁴ Okóm béléu dou, són uu yóm tendo nefet nawahu mò tmóbóng dou. Senflósen temnù yóm kdóyónu kóm.

¹⁵ Tulónu bè kdéen tau hono tedeng yó kem nmoem. Snilefu kdaw heglalag du yóm nawam lemwà tau, balù yóm là hol gotu ketngónu du yóm kdê deng gel nmoem béléu.

¹⁶ Dóyónu yóm tey kegbekem, Dwata yóm Dwata hol dandónen geta, Tulónu bè kdéen tau tek són uu yóm tedeng, tek són uu yóm hyu.

¹⁷ Ó Dwata, lemwót bè hanà kngau yóm ktolokem dou ne efet ni yóm tendo ktulónu du bè yó kem dumu tau yóm tey kehyuhen yó kem gel nmoem.

¹⁸ Balù nim deng ktuhahu, ne denge nubón, hol béem bayà ou, Dwata, efet deng gotu bud tulónu bè yó kem lugod todol sut yóm tey genbekem, ne yóm tey hentaw ton gel nmoem bè yó kem tau sut huli dou.

¹⁹ Yóm tey ktedengem, Dwata, botong gefet ditu bè yóm hol longit geta. Tey bong hentaw yó kem deng gendengem, Dwata. Laen kô dù semnged kóm.

²⁰ Deng tey kehlayamem dou, okóm angat bud hlowilem ou. Hol lómón ke bud hlowilem ou gu lem lebeng.

²¹ Angat tey bud kehegetahem dou, ne bud henyuhem nawahu.

²² Ó Dwata, lemwót bè yóm là konol nawahem ebéléu, dóyónu u hlanu bè yóm gel kenbitu. Sngalu yóm sngal dmóyón kóm mung bè yóm sotu gel kenbitu. Uu se yóm Dwata laen dù belenen bè Israél.

²³ Hligale mensag bè yóm kesngalu dmóyón kóm, yakà deng nsokem dou.

²⁴ Snilefu kdaw tendo tmulón du yóm tey ktedeng yó kem gel nmoem, yakà deng le gotu mulék myak ne slaf yó kem tau tô malu hmatay dou.