Kem Lingón 7 - Udél Dwata: Gna Kesfasad ne Lomi Kesfasad

Lingón Dabid

¹ Ó Dwata yóm dou hol gónó mogot, són ebéléem gónów hofin. Lenwaem ou bè yóm kdê tau kemtes dou, hol lenwaem ou, Dwata.

² Ke là lenwaem dou nsék le ou, lómón ke liyun le, dyol le ou mayuk anì laen dù lemwà dou.

³ Ke denge mò sidek, Dwata yóm dou Dwata hol gónó mogot, duhen ke wen sidek tonem béléu,

⁴ ne ke deng mom bnalau sidek yóm hyu deng nmò weu béléu, duhen ke deng negefu kimu yó kem hohonu, baluen ke laen dù buten,

⁵ ke yó deng nmou, Dwata, yó ne hekfóem ou bè hohonu. Hfatayem ou bélê le, ne tódô bayaem lówóhu masà ta tonok.

⁶ Ó Dwata, hekmóni, géhéli lemwót, mung du lebutem. Senfatayem yó kem hohonu alì sidek kebut le dou. Géhéli lemwót, Dwata, nwitem yóm kukum tedeng.

⁷ Sentifunem e klohokem yóm kdéen tau. Myóni bè yóm gónóm myón kmamal ditu ta.

⁸ Gotu knukum Dwata yóm kdéen tau. Knukumem se ou, Dwata, hlanem bè yóm tedeng tonem béléu, yakà uu se yóm Dwata hol dandónen geta, deng tngónem yóm klaen dù salà deng nmou.

⁹ Nmoem sónen yóm sidek gel nmò yó kem tau gel mò sidek, okóm tnóbóngem yó kem tau mimón kóm. Uu temngón du, Dwata, yóm nô lem hendem tau ne yóm nô lem but blutut tau, yakà hono tedeng nmoem se kóm.

¹⁰ Dwata se kemlung dou, gel hewaen yó kem tau mimón du.

¹¹ Dwata se yóm tedeng kkukumen. Ket kdawen lembut kul yó kem tau mò sidek.

¹² Ke là hegselen yóm tau, yó nmò Dwata, eles gel néhéken sudengen, eles gel bentulen bohohen.

¹³ Deng eles hentifesen yó kem suk hatayen tau, ne yóm hanak mofi deng eles hetomen.

¹⁴ Yó kem tau mò sidek, deng eles natul le yóm sidek nmò le. Natul le yóm kmò kesbeweg le tau, ne són smukat nmò le.

¹⁵ Mokol le sol nelem mò gónó le malu tau, okóm bud lu se btang elemen.

¹⁶ Bud mulék eta le yóm sidek tô nmò le bè dumu tau. Natul le hemsidek dumu tau, okóm bud mulék eta le.

¹⁷ Slamate ebè Dwata lemwót bè yóm tey ktedengen. Sngalu yóm sngal dmóyón ke Dwata yóm Dwata hol Dandónen Geta.