Kem Lingón 69 - Udél Dwata: Gna Kesfasad ne Lomi Kesfasad

Lingón Dabid

¹ Ó Dwata, hol lenwaem ou. Lómó kegnómu du, lómón ke mifale él deng són bè liholu.

² Lómón ke denge gebeng lem hitok, là kóe gemdà tonok. Tey nelem yóm él gónóhu geblos, udì duen gónóhu là lemneb.

³ Tey kegenu tmaba ebéléem, Dwata, anì tnóbóngem ou. Ngangu tmaba efet des lem liholu. Sónmou mangat temngel du ke wen tóbóngem dou efet là buden gmefet ketngelu.

⁴ Tey dê kem tau kmutó nawa dou balù yóm klaen dù duón le dou. Ke nsóhem lu, bong le wen senta yó kem balu weku. Tey dê udél le gbak ebéléu hono kéng. Tey le kemgis yó kem tau yó, kóyô le ke ghatay le ou. Laen kô dù deng hennagawu bélê le, okóm deng mom henni le ou swì.

⁵ Là kóen gebnos béléem, Dwata, yó kem salau. Tódô tngónem yóm tehe tey ungelu.

⁶ Hol tnóbóngem ou anì laen dù gónó le myak béléu yó kem tau smalig kóm. Uu se yóm Dwata hol dandónen geta gónóhu mogot, laen dù là gbekem du. Hol tnóbóngem ou anì laen dù gónó le myak béléu yó kem tau gel tmaba ebéléem. Yakà uu du yóm kum Dwata mi kem tau Israél.

⁷ Mom hennê le ou lanu lemolò kóm. Tey sidek kehyak le dou.

⁸ Balù yó kem dumuhu setwoli, lómón ke olohe tau milo ebélê le. Senged se yó kem dou fes lówó, lómón ke tólónge tau bélê le.

⁹ Tey kkinì nawahu edu yóm Gónóem, Dwata, lómó kegnómu du, hol lómón ke ofi temluk lem kfuhu. Fen tódô ebéléu yóm kehnê le kóm yó kem tau.

¹⁰ Tey keheglaanu knóu, gloku fasting, deng mom hennê le ou yó kem tau.

¹¹ Bè yóm keseku yóm nes gel lesek yó kem tau langag, deng mom bud knuli le ou.

¹² Sentulón le ou bè gónón wen. Balù yó kem tau lengel, gel utóm le ou lingón.

¹³ Okóm béléu dou, Dwata, tódô senflósu mni béléem. Hol bnalaem ou sok kól yóm kdaw tngónem hyu béléu. Hol bnalaem ou lemwót bè yóm kbong nawahem dou, ne lemwót bè kdohò yóm fasadem lemwà dou.

¹⁴ Hol lenwaem ou anì là hlóse gebeng lem hitok. Hol kenlungem ou bè yó kem hohonu. Nalakem ou anì gifalu yóm tey él nelem ni.

¹⁵ Béem heslob ou dunuk anì là lemnebe, anì là mataye.

¹⁶ Hol bnalaem ou, Dwata, lemwót bè yóm là konolen yóm kbong nawahem dou. Beklili ebéléu lemwót bè yóm kkoduhem dou.

¹⁷ Hol béem henbnos ou, Dwata, yakà ou du yóm gel tóbóng lówóhem. Tey bong nim hlayam nô tahu, géhél bnalaem ou ne.

¹⁸ Géhéli dou edini, lenwaem ou. Hol lenwaem ou lem tdok yó kem hohonu.

¹⁹ Deng gungolem yóm tey kehnê le dou ne yóm kehyak le dou. Laen kô dù adat le dou. Gotu tonem kdê hohonu.

²⁰ Deng tey sidek kebà nawahu lemwót bè yóm tey kehnê le dou. Tey deng sidek ne kegnómu du. Ofol dou ke wen tau kmodu dou mò hemyu nawahu, okóm là, balù sotu.

²¹ Deng mom yó nmò le béléu, bè yóm kbitilu, mom hken le dou yóm gónóhu milu. Bè yóm kleengu, mom hinum le dou tifas bali.

²² Hol henbalingen mò gónó le gholot yóm tey ken wen bè lemisa le. Yóm klaen dù gónó le élél, nmoem mò gónó le bkó.

²³ Hol hbutóem lu. Hol henblatem yóm nbô le efet laen dù bud kgis le.

²⁴ Béem sen-gafas yóm kebutem kul. Hol hefegnómem kul yóm kekbéem du yóm gel nmò le.

²⁵ Hyu ke laen dù bud tauhen yó kem kamfù le. Hyu ke laen dù tebel bè yó kem gónó le nô yó, balù sotu.

²⁶ Yó gónóhu mon du mò kóm yóm yó, abay se bè yóm ktafakem yó kem kóm tau, kulel se kul kmò sidek bélê le yó kem hohon le. Tey sidek kestulón le kul yó kem tau deng hendesem yó.

²⁷ Hol snoloem yóm kdê salà le. Béem homong lu bè yó kem tau lenwaem gu lem hatay.

²⁸ Hol kóhem yóm boluy le bè yóm bok gónóm smulat boluy yó kem tau gmuta du yóm klowil laen dù sónen. Béem homong lista lu bè boluy yó kem kóm tau.

²⁹ Okóm béléu dou, Dwata, deng tey alì sidek kegnómu du. Bud bentikem ou, hol lenwaem ou.

³⁰ Duhen ni, Dwata, angat tey kdóyónu kóm hlanu bè klingónu. Ne heglalagu yóm tey kegetahem hlanu bè yóm kdóyónu kóm.

³¹ Tey bong kligalem du yóm kdóyónu kóm senta yó kem safì dsuu ebéléem, anien he ke demsue ebéléem safì tudu.

³² Ke ton yó kem tau gel hen-gnok le yóm kdóyónu kóm, tey kehyu nawa le. Tey kegdufen kul yó kem tau gel tmaba ebéléem.

³³ Yóm Dwata, gel hnungolen yó kem tau élél gel htóbóng béléen, ne là kô klifóten kul yó kem kun tau deng geblanggù.

³⁴ Yóm kdéen nô bè longit ne yóm kdéen nô te tonok ne yóm kdéen nô lem mohin, hol dóyón ye Dwata.

³⁵ Angat lenwaen Jirusalim bè yó kem hohonen. Bud hefdaen yó kem dumu benwu bè prubinsya Juda. Ne gotu le bud nô bè yó, yó kem kun tau, nfun le yóm klamangen.

³⁶ Kkólen bè yó kem semfu gu bè yó kem tau tóbóng lówó Dwata, angat gfun le yóm klamangen. Ne menwu le bè yó, yó kem tau kembong nawa ke Dwata.