Kem Lingón 68 - Udél Dwata: Gna Kesfasad ne Lomi Kesfasad

Lingón Dabid

¹ Yó ne, Dwata, géhél senklahem lu yó kem hohonem. Hlóyem lu yó kem tau mutó nawa kóm.

² Hol gotu lohem lu, lómó kmoem kul, lómón ke kebel nyuf lenos. Lómón yóm tolu mnò bè ofi, hol lómón yó se keglaem kul bè soluhem yó kem tau gel mò sidek.

³ Okóm kul yó kem tau tedeng kmò le, hol hefligalem lu. Hol hefligalem lu bè soluhem. Yake hol le hligal mensag.

⁴ Semngal tekuy ebè Dwata, sngal tekuy yó kem sngal dmóyón yóm kun boluy. Hol dóyón tekuy yóm myón smakay lobun. Dwata se boluyen. Hol tekuy hligal bè soluhen.

⁵ Du se mà yó kem ngà hikit, ne du se gel mofin yó kem libun bolu. Yó se yóm kun kmò Dwata, tey mólós yóm gónóhen nô.

⁶ Dwata se bemlay kul fes lówó yó kem tau laen dù ngaen. Ne hfewaen yó kem tau blanggù, benlayen lu kligal. Okóm bè yó kem tau kmogol du, glumfak le bitil bong ne tey keglayam le.

⁷ Ó Dwata, bè yóm tehe kalakem yó kem kóm tau gu bè Idyip, bè yóm kehlalakem kul bè yóm benwu laen hol wen tauhen,

⁸ botong megsinsig tonok, lelen tey kulón bong tukô gna kóm, yóm Dwata bè Sinay yóm Dwata yó kem tau Israél.

⁹ Ya tey kehkulónem du, Dwata, botong héfê yóm tonok alì mékéng, yóm tonok deng fasadem mò blayem yó kem kóm tau.

¹⁰ Bè yóm tonok yó gónó le hlós menwu yó kem kóm tau. Lemwót bè yóm tey kehyuhem, Dwata, uu se mitung mò ken le yó kem kóm tau élél.

¹¹ Heglalag Dwata yóm kegmoen, ne tey dê libun fen heglalag du yóm tulón hyu yó.

¹² Gotu le mlóy yó kem tau hol geta hohon me, mung kul yó kem sendalù nalak le. Ne yó kem libun bè Israél, gotu sensólól le yó kem kimu deng negef yó kem sendalù le.

¹³ Balù yó kem libun tebel bè yó kem ubiha le, okóm ni, deng tódô glimun lówó le blówón bukay ne tahu blówón, lómón yóm hafak obun, kun glimun bè lówóhen.

¹⁴ Yó nmò Dwata yóm Dwata laen dù là gbeken du, gotu senklahen lu yó kem tau hol geta hohon me. Yóm keseklahen kul yó, hol lómón ke yóm lenos bong semkla yóm snu ta Bulul Salmun.

¹⁵ Tey kegetahen yóm bulul bè Basan, yóm bulul alì temfusù.

¹⁶ Ó bulul alì temfusù, moen du ke nélés nawa ye yóm Bulul Sayun, yóm bulul deng nélék Dwata mò hol gónón nô, laen kô dù tul sónen yóm knóen du.

¹⁷ Kewót Dwata bè Bulul Sinay, mung du yó kem klitun tók là bud gsóhem du hilu libuhen, tódô hlós ebè yóm kun Gónô bè Bulul Sayun.

¹⁸ Bè yóm kegdekem ta bè yóm bulul geta yó, Dwata, tey kem tau negef nalakem mung kóm. Wen tey basa slong le kóm yó kem tau, balù yó kem tau deng matù kóm, sana kwen kul basa kóm. Duhen ni, deng nô lem blóng tekuy bè ni yóm sana kut Dwata hol gónó mogot.

¹⁹ Hol dóyón tekuy Dwata. Hol dóyón tekuy yóm Dwata deng lemwà tekuy. Tódô ket kdawen tmóbóng tekuy bè yó kem blat nô ta tekuy.

²⁰ Yóm kut Dwata, du se yóm Dwata gel lemwà tekuy. Du se yóm Dwata hol gónó tekuy mogot gel lemwà tekuy gu lem hatay.

²¹ Angat lenuna Dwata kulu yó kem hohonen, kulu yó kem tau tendo seflós mò sidek.

²² Yó udél Dwata, monen, “Bud nwitu lu mosol gu bè Basan yó kem hohonu, ne yó kem dumu hohonu, bud nitu lu gu lem sokol mohin.

²³ Yu kem dou tau, angat nolob ye ti ye bè litô yó kem hohonu deng hnatayu. Balù yó kem ohu ye, sana kwen kul dilut bè yóm litô le yó.”

²⁴ Tonu, Dwata, yó kem tey tau wen mung kóm mógów. Tonu yóm kógów yóm dou Dwata yóm dou Hol Geta, tódô hlós elem gónóen.

²⁵ Tukô gna du yó kem tau hulung semngal, ne huli du yó kem tau hulung le huni yó kem nyuf le. Mung bélê le yó kem sawang libun, huni yó kem tamburin.

²⁶ Yu kem tau Israél, hol dóyón tekuy Dwata. Hol dóyón tekuy Dwata, du se gónón tembul yóm klowil tekuy.

²⁷ Ngem, tukô gna yó kem sfu Bindyamin, là hol le wen. Tmodol yó kem tey tmuha fen malak lemwót bè ból Juda, ne bè ból Sibulun, ne bè ból Naftali.

²⁸ Ó Dwata, hegfanem yóm kegbekem. Hol hegfanem yóm kgisem lómón yóm tehe gel nmoem bélê me.

²⁹ Wen tey basa nwit le ebéléem ebè Gónóem bè Jirusalim yó kem tau hol geta lemwót bè klamangen benwu.

³⁰ Nudélem yó kem benwu hohonem. Hol lómó kmò le, lómón yó kem ógóf lóbô nô lem teblow, ne hol lómón kmò le yó kem safì tudu mung bè yó kem ngà safì. Hol heglaanem yó kem tau bè dumu benwu wen gel hbayad le kum. Gotu senklahem lu yó kem tau bè yó kem benwu alì móyô mò gida.

³¹ Yó kem tau bè Idyip, hyu ke mit le kem tembaga alì mebtes mò basa le kóm. Yó kem tau Ityupya, hyu ke hol le heglaan béléem.

³² Ó kem tau bè klamangen benwu, semngal ye ebè Dwata. Sngal ye yó kem sngal dmóyón ke Dwata.

³³ Semngal ye ebè yóm Dwata wen snakayen gel mlan bè yóm longit là sekna. Ke mudél, hol lómón ke lemték gu bè longit.

³⁴ Hol tulón ye bè kdéen tau yóm tey kegbek Dwata. Sminang ta yó kem tauhen Israél yóm tey kegetahen. Gfan bè longit yóm tey kekgisen.

³⁵ Tey knikò yóm Dwata nô lem yóm kun Gónô, yóm Dwata yó kem tau Israél. Du se bemlay kfasang ne kgis bè yó kem tauhen. Hol megdóyón yóm Dwata.