Kem Lingón 66 - Udél Dwata: Gna Kesfasad ne Lomi Kesfasad

Sotu Lingón

¹ Yu kem tau bè klamangen benwu, hol ye hligal mensag bè yóm kdóyón ye ke Dwata.

² Sngal ye yóm tey keklóón yóm kun boluy. Tulón ye bè klamangen benwu yóm tey kun keklóón.

³ Mon ye mò ke Dwata, “Tey hentaw me yó kem deng nmoem. Lemwót yó kem hohonem, gotu le likò bè yóm tey kegbekem.

⁴ Kdéen mowil te tonok, angat le gotu tmaba ebéléem. Angat sngal le yóm kdóyón le kóm, sngal le yóm kdóyón le yóm kóm boluy.”

⁵ Géhél ye dé, na ye na tengel yóm deng nmò Dwata. Wen tey hentaw ton nmoen bè kem kun tau.

⁶ Deng wen lan nmoen hlalak lem Mohin Hulô, omin le mifal du yó kem kun tau. Géhél ye dé, hol hnigal tekuy yóm Dwata gembek mò du nim ni.

⁷ Lemwót bè yóm tey kegbeken, laen tul sónen yóm kkamalen yóm klamangen. Tendo tenngelen yóm gel nmò yó kem tau bè ket benwu. Béen wen tau tô hguluk matù du.

⁸ Ó kem tau bè klamangen benwu, hol dóyón ye yóm kum Dwata, hol sngal ye yóm kdóyón ye du.

⁹ Nô lem hólólen yóm klowil tekuy, ne sen-galaken tekuy anì là tlokob tekuy.

¹⁰ Deng tnilówem mi, Dwata. Lómón yóm blówón bukay hlan le bè ofi anì baling hol tahu duhen, lómón yó se yóm ktilówem kum.

¹¹ Deng tehe hnuketem mi, ne tey blat yóm hbóem kum bè yóm tehe keghesek me.

¹² Deng hlusem yó kem hohon me anì hol ndà le mi elaan. Hol lómón ke deng me mlan lem ofi ne lem dunuk. Okóm deng mom nwitem mi ebè yóm benwu là élélen.

¹³ Ni mógówe ebè yóm kóm Gónô naw e demsù hkekeb ebéléem mò gónóhu dmohò du yóm deng fasadu kóm.

¹⁴ Yó se yóm fasad deng gungolem nmou béléem bè yóm kdaw kwen alì gónóhu glayam.

¹⁵ Yó se gónóhu demsù yó kem hkekeb ebéléem, duhen yó kem ubihahu logi alì hyu mò hboohu ebéléem. Ne bude demsù ebéléem yó kem safì tudu ne yó kem kambing.

¹⁶ Yu kem tau wen klikò ye ke Dwata, géhél ye ne, ne hol ye hmungol, naw e tulón kuy yóm deng nmò Dwata béléu.

¹⁷ Yakà deng tey kehtóbóngu béléen, ne hono udél dmóyón du yóm btang bè sumóngu.

¹⁸ Ke là deng benkasu du yóm salà deng nmou, là kô hnungol Dwata dou.

¹⁹ Okóm deng hnungol Dwata ou. Deng kenmónen yóm knihu béléen.

²⁰ Dóyónu Dwata, abay se là kô kenbéen du yóm knihu, ne là kô kóhen du yóm kbong nawan dou.