Kem Lingón 65 - Udél Dwata: Gna Kesfasad ne Lomi Kesfasad

Lingón Dabid

¹ Ó Dwata, knóón bélê me ke hol dóyón me uu bè yóm kóm Bulul Sayun. Knóón ke dnohò me yó kem deng fasad me kóm,

² abay se gel bnalaem yóm kni me ebéléem. Angat tódô kdéen tau bè klamangen benwu, gotu le mógów ebéléem

³ na le e hkó kóm salà le. Laen kô dù bud gmò me ne lemwót bè yó kem sidek gel nmò me, okóm tódô gotu hnifótem bélê me.

⁴ Hligal le kul yó kem tau nélékem, yó kem tau nitem edyó béléem bè kóm Gónô. Tey kegsengel nawa me du yó kem hyu nô lem Gónóem, ne yó kem tóbóngem kum lemwót lemen.

⁵ Ó Dwata, yóm gel lemwà kum, gel bnalaem se yóm kni me béléem mlan bè yóm kehegmoem kum bè kem hohon me. Tey dê hentaw ton nmoem mò gónóm lemwà kum. Gotu snalig le uu yó kem tau bè klamangen benwu. Balù yó kem tau fatu mohin, snalig le uu snéen kul.

⁶ Tey mdengen gónóm hemsù kul yó kem bulul mlan bè yóm tey kfasangem. Yó se gónón gfan yóm tey kegbekem.

⁷ Balù yóm tey lungkul lewók mohin, botong gbekem henek du. Ne gbekem henek kul snéen yó kem tau alì sembeweg kbenwu.

⁸ Tey klikò le kóm yó kem tau bè klamangen benwu lan le mton yó kem hentaw ton gel nmoem. Gotu le hligal mensag yó kem tau mton du lenwóten bè doli tonok kól bè dolihen.

⁹ Tey kehedemem du yóm tonok, Dwata. Sal gel hkulónem etahen anì hyu, ne anì hol mabù huluhen. Ne senflósem hlel kul yó kem él. Ne wen se kem hulu htowokem te tonok mò hlowil tau, yó se kmoem du.

¹⁰ Gel hkulónem eta yó kem dnadu efet gotu héfê. Ne wen ngà blanas mò hebu yóm tonok anì tmowok yó kem hulu.

¹¹ Tey wen nuta lemwót bè yóm tey kehyu nmoem. Balù kihu gónóm e solu, Dwata, tendo tey wen hulu gel nuta le.

¹² Tey mabù bnesen mò gónó le mótób yó kem ógóf. Ne tey bulók bè yó kem bililen, hol lómón ke hegfanen yóm tey kligalen.

¹³ Tey ubiha wen mótób bè yó, ne tódô hono halay yóm datalen. Yóm kdéen ton, hol lómón ke gotu le mensag ne semngal lemwót bè kligal le.