Kem Lingón 64 - Udél Dwata: Gna Kesfasad ne Lomi Kesfasad

Lingón Dabid

¹ Ó Dwata, hol hnungolem dou nim tnalawu. Hol lenwaem ou bè ni kem tey ifis le dou yó kem hohonu.

² Hol kenlungem ou bè yó kem tau gel mò sidek matul dou, ne bè yó kem tey tau wen deng matul dou.

³ Tey telem dilak le, hol lómón ktelem yóm sudeng sbalà bak. Yóm kdes yóm udél le, hol lómón kdes yóm bak hanak gónó matay.

⁴ Tódô hnékét gentì le yó kem tau laen dù salà le, tódô kentut gentì le lu, balù udì ke wen klikò le.

⁵ Sónmò le tendo sbót mò sidek ne matul hmolot. Yó mon le, “Laen kô dù tau mton kum.”

⁶ Yóm igò le matul mò du yóm sidek, yó mon le, “Deng wen atul nmò me hono hyu.” Tahu se, yóm kehedem tau ne yóm nawahen, tey hulung mò atul.

⁷ Okóm ke Dwata, gbeken gemtì kul. Là kói temdemen, tódô le gotu metlool bè bak hanaken.

⁸ Lemwót bè yóm kudél le, yó gónó Dwata gemlà kul. Kdê yó kem mton yóm keglà le, angat le gotu hising.

⁹ Angat le gotu likò yóm kdéen tau, ne gotu tulón le yó kem tey genbek deng nmò Dwata, ne sónmò le hemdem du yó kem deng gendengen.

¹⁰ Kdê yó kem tau tedeng nmò le, hol le hligal lemwót bè yóm deng nmò Dwata, ne bè Dwata gónó le e mlo. Ne yó kem tau hyu kmò le, tey kdóyón le ke Dwata.