Kem Lingón 63 - Udél Dwata: Gna Kesfasad ne Lomi Kesfasad

Lingón Dabid

¹ Ó Dwata, uu se yóm hol dou Dwata, tey khahuu kóm. Tey kesgalu nawahu kóm. Hol lómó kegnómu du, hol lómón yóm tonok mékéng là buden hyu, balù udì ke méfê. Hol lómón yó se kegnómu du bè yóm khahuu kóm.

² Deng tehe tonu uu lem Gónóem, deng tonu yóm tey kfasangem ne yóm tey keslinangem.

³ Yóm là konol nawahem ebéléu, tey bong muhen béléu he yó senta yóm klowilu. Yó gónóhu hol dmóyón kóm.

⁴ Klawihu mowil, sónmou tendo bemlay slamat béléem. Hdau eta sigelu bè yóm gel knihu ebéléem.

⁵ Angat tey kegsengel nawahu du yóm kehlonihu béléem, hol lómón ke hdengene mken bè yóm mò ken bong. Hligale lemingón béléem mò gónóhu dmóyón kóm.

⁶ Ke hlilile bè gónóhu tungô, sónmou hemdem kóm. Senflósu kifu hemdem kóm,

⁷ abay se són uu yóm tendo tmóbóng dou. Tey kehligalu lemingón bè yóm kofinem dou. Lómó kegnómu du, lómón ke nóe laan hafakem.

⁸ Mogote béléem, Dwata, ne tey mbegel se yóm kogotem dou, yó gónón laen dù hemenu.

⁹ Yó kem tau tendo malu hmatay dou, angat le mógów ebè yóm benwu yó kem tau deng matay.

¹⁰ Angat le gotu matay bè gida, ne gotu nsék yó kem ógóf lem bnes lówó le.

¹¹ Okóm béléu dou, yóm tau hol geta deng nélékem, tey kligalu lemwót bè yóm kehegmoem dou. Yó kem tau gel dnohò le yóm fasad le hlan le bè boluy Dwata, angat tey kdóyón le ke Dwata. Okóm yó kem tau gel mò kéng, angat hegfan Dwata yóm kéng le, là kô le bud gudél.