Kem Lingón 62 - Udél Dwata: Gna Kesfasad ne Lomi Kesfasad

Lingón Dabid

¹ Tódóe htinof mangat ke Dwata, abay se lemwót béléen yóm dou kegewà.

² Tek sónen du yóm botu gónóhu gel heklung, yóm gel lemwà dou. Du se yóm gónów gel hofin là bude sliwo.

³ Tey dê yó kem hohonu, tek sotu blà le, kdê le gotu mifis hmatay dou. Kton le dou, lómón tóe beng deng gbà, duhen ke labat deng gotu hugón.

⁴ Yó atul le tô tenklé le ou bè yóm deng kegeta glalu. Sónmò le mò tulón lenbù etahu. Swè le béléu ke ssolu me, okóm lem but blutut le, henmulà le ou.

⁵ Tódóe htinof mangat ke Dwata, abay se són du dou nefet nawa.

⁶ Tek sónen du yóm botu gónóhu gel heklung, yóm gel lemwà dou. Du se yóm dou gónó gel hofin, là bude sliwo.

⁷ Sal lemwót bè Dwata yóm kegewau, dalang se yóm kadat le dou yó kem tau, bud lemwót bè Dwata. Du se dou gónó e mlo, yóm botu gónóhu gel heklung. Laen dù bud hohonu sut béléu bè yó.

⁸ Ó kem dou tau, hol tendo snalig ye Dwata. Tulón ye du yó kem blat nô ta ye, abay se Dwata se yóm gónó tekuy e mlo.

⁹ Kewóten bè yóm tau hol geta kól bè yóm tau hol glaan, laen kô dù mu le. Ke tnimbangem lu, mo le mom maan senta nawa.

¹⁰ Béem tô nalu nawa ke tói mdengen ke mlan bè kgagahem duhen ke mlan bè knagawem. Ke temnù kendengenem, béem alì hsù du nawam.

¹¹ Tey mtukul kmon Dwata du, ne deng tey dê duléku mungol du, Dwata se funen yóm kfasang.

¹² Ne bud kóm funen, Dwata, yóm kbong nawa là monolen. Yóm ofol blayem bè tau, tódô geblà bè yóm deng kul nmò.