Kem Lingón 61 - Udél Dwata: Gna Kesfasad ne Lomi Kesfasad

Lingón Dabid

¹ Ó Dwata, hol hnungolem yóm kehtóbóngu béléem. Hnungolem yóm hnihu béléem.

² Htóbónge béléem, kewótu bè sokol tonok abay se tey sidek kegnómu du. Hol nwitem ou ebè yóm botu geta sentahu gónón laen dù hemenu,

³ yakà són uu du yóm tinof gónó e mlo, yóm gónów hofin gónó le là gmuta dou yó kem hohonu.

⁴ Hol hnóem ou bè yóm kóm Gónô kól bè laen dù sónen, laen kô dù hemenu ke hgolunge laan hafakem.

⁵ Deng gungolem, Dwata, yó kem fasadu kóm. Deng sana wen blayem dou lemwót bè yó kem deng henyuhem yóm mò genfun yó kem tau kmikò kóm.

⁶ Hol htahaem klowil yóm tau hol geta efet dê bud lugoden. Hyu ke dê lugod tau tonen.

⁷ Hyu ke laen dù sónen yóm kogoten benwu bè solu Dwata. Hol lambungem du, Dwata, yóm là konolen yóm kbong nawam du ne yóm ktenebem béléen.

⁸ Ominu yó tendo semngal yó kem sngal dmóyón kóm yóm igou dmohò du ket kdaw yó kem fasadu kóm.