Kem Lingón 60 - Udél Dwata: Gna Kesfasad ne Lomi Kesfasad

Lingón Dabid

¹ Ó Dwata, deng kenbéem mi, ne deng genbaem yóm gónó me gel heklung. Deng lenbutem mi, ni nam bud hulék mi ebéléem.

² Deng hlinolem bè tonok me, ne deng tódô setngag. Tnibengem nim gónón setngag ni, déke mom hlos gebà.

³ Deng tey kehlayamem kum, mom hinumem kum yóm tifas grép gónó me lengel.

⁴ Okóm deng eles wen ilô hdaem bè yó kem tau wen klikò le kóm anì ke sok kól yóm kundug le kul yó kem hohon le, gotu le mlóy bè yó anì laen dù hemen le.

⁵ Hol lenwaem mi mlan bè yóm sigel kwananem, ne lenwaem yó kem kóm tau kenbong nawa.

⁶ Bè yó bè Gónô Dwata, yó udél Dwata, monen, “Bè yóm kegmou, angat nólólu bè yó kem dou tau yóm benwu Sékém ne yóm datal bè Sukut.

⁷ Dou funen yóm benwu Gilyad, ne yóm benwu Manasi, bud dou funen. Bè benwu Ifraim gónón lemwót yóm dou sloung bè gida, ne bè benwu Juda gónón lemwót yó kem dou tau hol geta.

⁸ Lemwót yó kem tau bè Muab, lu angat tóbóng lówóhu, ne kem tau Idom mò heseku. Angate hol mensag lemwót bè yóm kegmou bè yó kem tau Flistin.”

⁹ Okóm tau du de angat mit dou elem yóm syudad Idom mbegel beng hilolen? Tmau du de angat hegmò dou bè yó kem tau Idom?

¹⁰ Deng kenbéem mi ne kô, Dwata? Là budi mung bè yó kem sendalù me ne kô?

¹¹ Hol tnóbóngem mi dé semfatay yó kem hohon me, abay se yóm kun któbóng yóm tau, laen kô dù gónón e kól.

¹² Lemwót bè kun tóbóng Dwata, angat tey bong gendeng me, abay se gbeken gemlà yó kem hohon me.