Kem Lingón 6 - Udél Dwata: Gna Kesfasad ne Lomi Kesfasad

Lingón Dabid

¹ Ó Dwata, béem nudél ou ke mlan bè kebutem, ne béem abay tnafak ou ke hlanem bè alì kebutem.

² Knoduhem ou, Dwata, abay se laen dù bud kgisu. Hkóhem dou nim des lem lówóhu, Dwata, abay se alì sidek kegnómu du.

³ Tey sidek kebà nawahu. Kegenen ne duen, Dwata, ominem tmóbóng dou?

⁴ Beklili ebéléu, Dwata, hewaem ou. Lenwaem ou lem hatay lemwót bè yóm là konol nawahem ebéléu.

⁵ Abay se bè benwu yó kem tau deng matay, laen dù bud tau hemtulón kóm nawa. Tau du se tô dmóyón kóm bè yó?

⁶ Denge tey miteg ne bè yóm gel klangagu. Tódô keten kifu héfê gónów tungô lemwót bè lewoku. Tódô senflósen héfê kamahu.

⁷ Tendo lembóg matahu lanu alì mkik. Nkiku yóm tendo nmò le béléu yó kem hohonu.

⁸ Ó kem tau gel mò sidek, hlayuk ye béléu, yakà deng gungol Dwata du yóm kkiku.

⁹ Deng gungol Dwata yóm kehkoduhu béléen. Angat bnalaen yóm hnihu yó.

¹⁰ Angat le gotu mulék myak yó kem hohonu, mung du yóm tey klikò le. Angat le tódô kendel mlóy semfulék, ya tey sidek kyak le.