Kem Lingón 58 - Udél Dwata: Gna Kesfasad ne Lomi Kesfasad

Lingón Dabid

¹ Yu kem tau mogot benwu, tedeng kô yóm kkukum ye? Laen dù mtukul nfi ye kô bè yóm gel kkukum ye tau?

² Kaem là, sal sigol yóm gel kwit ye, ne són hemsidek tau yóm gel nmò ye, laen kô dù tedeng du.

³ Ni kem tau mò sidek ni, tódô mung bè ksut le gemsalà. Kewóten bè ksut le yóm kmò le kéng.

⁴ Wen tey alas le lómón alas ulal. Mkél le bè sedof, là kô le móyô hmungol.

⁵ Là kenmón le du yóm gel huni yó kem tau hembeyen ulal, balù nô kehtilob kuni le du.

⁶ Ó Dwata, tenfokem nihi le. Gotu senfékem kakim le, Dwata, ni kem liyun ni.

⁷ Hol heklanasem lu lómón kekti yóm él bè gónón mékéng tonok. Ne lómón yóm bnes nô bè gónón gel mlan tau, sal gel menes.

⁸ Hol le mkél bè yóm byukung, són tonem danà iwolen. Ne lómón ke mkél le bè yóm ngà sut hosot, là kô tonen du nóng kdaw.

⁹ Angat gotu kó Dwata lu, homongen yó kem lomi tau dalang se yó kem tuha. Là kóen legen kmoen du, lómón yóm kuleng nô ta ofi, là legenen deng sana kinì.

¹⁰ Bong yó kem tau tedeng, angat tey kehligal le kul ke ton le yóm kbeles Dwata kul yó kem tau là tedeng kwit le kukum. Angat nolob le ti le bè litô yó kem tau gel mò sidek deng hnatay le.

¹¹ Yó angat mon yó kem tau, “Tahu se, wen ofol blay Dwata kul yó kem tau tedeng kmò le. Bè ktahuhen, Dwata se fen mit du yóm kukum tedeng bè yó kem tau talak tonok.”