Kem Lingón 57 - Udél Dwata: Gna Kesfasad ne Lomi Kesfasad

Lingón Dabid

¹ Hol knoduhem ou, Dwata, hol knoduhem ou, tek són uu gónów gel hofin. Angate hebnos laan hafakem efet gotu mkó yóm tey lenos bong nii.

² Hole hkodu ebè yóm Dwata hol Dandónen Geta, yóm Dwata angat hdohò du yóm kun kóyô béléu.

³ Angat wen tóbóng hwiten gu bè longit mò lemwà dou, anì lenwaen ou bè yó kem tau tô malu hmatay dou. Hegfan Dwata béléu yóm là konol yóm kbong nawan dou ne yóm tey kteneben béléu.

⁴ Tódô snibut le ou yó kem hohonu, hol lómó kmò le, lómón yó kem liyun alì bitil móyô msék tau. Yóm ktelem yó kem nihi le, hol lómón ktelem yó kem buyus ne yó kem hanak. Tey telem kudél le, hol lómón ktelem yó kem sudeng sbalà bak.

⁵ Holi hegeta, Dwata, senta yó kem longit alì geta. Hyu ke hol gfan bè klamangen benwu yóm tey keslinangem.

⁶ Yó kem hohonu, wen holot nmò le mò alu le dou, ne deng tey sidek klitegu lemwót bè yóm alì keglayamu. Deng wen sol nokol le bè lanu mò gónó le hebtang dou, okóm deng mom lu bud btang elemen.

⁷ Tek sónen uu, Dwata, yóm gónón hol nô nawahu. Lingónu yóm lingón dmóyón kóm.

⁸ Yó hendemu, btike dé anì nunihu yó kem gel kenbitu. Naw bentik kdaw mlan bè lingón.

⁹ Angate slamat béléem, Dwata, bè solu yóm kdéen tau. Angat lingónu bè yó kem dumu benwu hmilol yóm lingón dmóyón kóm.

¹⁰ Yóm kbong nawam dou là monolen yó, hol lómó kbongen longit. Yóm ktenebem béléu, botong gefet bè yó kem lobun.

¹¹ Holi hegeta, Dwata, senta yó kem longit alì geta. Hyu ke hol gfan bè klamangen benwu yóm tey keslinangem.