Kem Lingón 56 - Udél Dwata: Gna Kesfasad ne Lomi Kesfasad

Lingón Dabid

¹ Ó Dwata, hol knoduhem ou, abay se deng nundug le ou yó kem hohonu. Knoyung le kdaw mundug dou.

² Knoyung le kdaw kemtes dou yó kem tau gel sidek udél le etahu. Tey le dê yóm heklabak mit dou sfatay.

³ Okóm ke gele likò, són uu snaligu.

⁴ Tey kdóyónu du yóm udélem, Dwata. Són Dwata snaligu, yó gónów là likò. Laen dù gmò le béléu yó kem tau tonok.

⁵ Sónmò snigol yó kem hohonu ke wen monu. Sónmò natul le yóm lan le hemsidek dou.

⁶ Gel le stifun bè yóm gónón gebnos, tendo tenngel le yóm kdê nmou, sen-galu le ke hnatay le ou.

⁷ Hol bnelesem lu bè yóm sidek nmò le. Mlan bè kebutem, Dwata, hol genlaem lu.

⁸ Deng gotu tngónem yóm kdê lenóngónu. Deng tngónem se ke deng hilu duléken mosok lewoku. Kaem deng listahem bè bokem.

⁹ Bè yóm kdawu htóbóng béléem, Dwata, gotu le beklil mulék yó kem hohonu. Bè yó se gónóhu temngón du deng nfi Dwata ou.

¹⁰ Ó Dwata, tey kdóyónu du yóm udélem. Tahu se, Dwata, dóyónu yóm udélem.

¹¹ Són Dwata snaligu, yó gónów là likò. Laen dù gmò le béléu yó kem tau tonok.

¹² Dnohou yóm deng fasadu kóm, Dwata. Dsuu ebéléem yóm dsù gónóhu dmóyón kóm lanu slamat bè yóm któbóngem dou.

¹³ Yakà deng lenwaem ou lem hatay, ne deng tnóbóngem ou anì là tlokobe. Duhen ni, elese tendo nô bè soluhem, Dwata, nóe bè yóm kóm layag tendo hlowil dou.