Kem Lingón 55 - Udél Dwata: Gna Kesfasad ne Lomi Kesfasad

Lingón Dabid

¹ Ó Dwata, hol hnungolem dou yóm hnihu. Hol béem là kenmón yóm kehtóbóngu béléem.

² Hol hnungolem ou, ne bnalaem ou. Tey sidek klóngónu lemwót bè ni kem tey gfau.

³ Tey kehtê le dou yó kem hohonu, nifis le ou. Tendo hnayam le ou, lel le kmutó nawa dou, mung du lebut le.

⁴ Tey sidek klikou, deng glumfak béléu yóm klikò matay.

⁵ Ya tey sidek klikou, botong setbol kkelu.

⁶ Yó monu, ke yó dum wen hafaku lómón obun, móyónge hlayuk, mebele gónóhu hegnô.

⁷ Móyónge etu mayuk, mdefe bè yóm benwu laen hol wen tauhen bè gónón tinof.

⁸ Hesloe mebel gónów heklung bè yóm tey lenos bong.

⁹ Hensengem yóm atul le, Dwata, ne senbewegem kudél le, yakà deng tonu du yóm tey kehsidek le tau lem syudad, lel le semfatay kul yó kem tau bè yó.

¹⁰ Yó kem tau nô lem yóm syudad yó, knoyung le kdaw ne kifu mentey gu ta beng yóm syudad le anì laen dù hohon le husek elemen. Okóm hol lem yóm syudad yó gónón smala sidek.

¹¹ Tódô hono kem tau hulung gembà yóm nô lemen. Bè yó kem bak lan, tódô hono tau mifis ne tau lemugi.

¹² Ke yó dum hohonu yóm hemnê dou, gbeku hembala du. Bede là hohonu du yóm hemnê dou yó. Ke hohonu, gbeku hembnos du.

¹³ Okóm mom uu yóm mò du béléu, dumuhu senged, ne dou dumu slomong, ne hol dou wè.

¹⁴ Tey tehe gel kesegduf te stulón, lel te slomong tmaba ebè Dwata bè Gónóen.

¹⁵ Hol mekto sut bélê le hatay he yó kem hohonu. Hol lebeng le lu tolo mowil, yakà dengen smala bélê le yóm sidek.

¹⁶ Okóm dou, htóbónge bè Dwata, ne angat lenwaen ou.

¹⁷ Keten hlafus ne kemdaw ne kifu kgefeten bè Dwata yóm tendo ktalawu ne kdolongu, ne gel hnungolen ou.

¹⁸ Lenwaen ou bè yóm kwit le dou sgida, baluen ke tey le wen yó kem hohonu.

¹⁹ Hnungolen ou Dwata yóm hol geta là sekna, ne angat heglaanen yó kem hohonu bè yóm là kegmò le, abay se là kô le móyô temles du yóm sana kul kmò, ne balù udì ke wen klikò le ke Dwata.

²⁰ Yóm tehe dou wè yó, deng mom hohonen ou, nuléhen yóm deng fasaden dou.

²¹ Tey lendey udélen, okóm lem but blututen hono utó nawa. Tey hyu udélen anì monem ktelem sudeng.

²² Hbóem ke Dwata dé yóm blat nô tahem anì du tmóbóng kóm. Là kô bayaen kul btang yó kem tau tedeng kmò le.

²³ Okóm uu, Dwata, angat mbot kul elem lanaw ofi yó kem tau sidek gel nmò le. Kem tau monok ne kem tau smukat, là kô guta le du ktuha le. Okóm dou, són uu snaligu.