Kem Lingón 52 - Udél Dwata: Gna Kesfasad ne Lomi Kesfasad

Lingón Dabid

¹ Ó tau kemgis, moen de ke tendo hen-gmónem yóm kmoem sidek bè yó kem tau mimón ke Dwata?

² Knoyungem kdaw tendo matul du yóm kmò keglaem tau. Tey telem yóm udélem, lómón ktelem yóm gel ki le. Teyi hulung mò kéng.

³ Alì henlom nawahem yóm sidek senta yóm hyu, ne yóm kéng senta yóm ktahuhen.

⁴ Ó tau mò kéng, ke mudéli, teyi móyô hemdes nawa kem dumuhem.

⁵ Okóm angat tek sulék keglà Dwata kóm, ne laen kô tul kegebtikem. Angat skoten uu bè gónóem, ngangen mò kóm efet kóhen uu lem blóng yó kem tau mowil talak tonok.

⁶ Yó kem tau gel mò du yóm tedeng, angat ton le nim ni ne tey sidek ketnga le. Angat knuli le uu, yó mon le,

⁷ “Tenngel ye dé yóm sendalù kemgis là snaligen ke Dwata mò mofin du. Mom snaligen yóm ali kwen kendengenen, ne deng mom temnù kbegelen lanen tendo gemlà yó kem dumuhen.”

⁸ Okóm dou, hol lómón ke ou yóm koyu ulib tmowok bè Gónô Dwata. Laen dù sónen yóm tendo ksaligu yóm kbong nawa Dwata là monolen.

⁹ Ó Dwata, laen kô dù tul sónen yóm tendo kdóyónu kóm lemwót bè yó kem deng gendengem. Dóyónu yóm tey kehyuhem lem blóng yó kem kóm tau.