Kem Lingón 51 - Udél Dwata: Gna Kesfasad ne Lomi Kesfasad

Lingón Dabid bè yóm knihen seflifót bè Dwata

¹ Ó Dwata, lemwót bè yóm là konol nawahem ebéléu, hol knoduhem ou. Lemwót bè yóm alì kkoduhem dou, hol kóhem béléu yó kem salau.

² Hol nolobem dou yó kem sidek deng nmou. Hol hólósem ou bè yó kem salau.

³ Tódô tngónu, Dwata, yó kem gónóhu gemsalà béléem. Là kóen mkó bè nawahu yó kem salà deng nmou.

⁴ Béléem nim gónóhu gemsalà ni, deng gmou yóm kenbéem. Yó gónóm mon, là kóen sidek ke hensalaem ou. Bong knóón ke tnafakem ou.

⁵ Tódô mung bè ksutu yóm óyóu mò sidek. Nbuten bè keblolu yê dou, eles nô béléu yóm óyô mò sidek yó.

⁶ Okóm yó gel sen-galuhem béléu yóm klaen dù kéngu lemwót bè kedket nawahu ebéléem, Ke yó se kóyóem béléu, Dwata, tolokem dou sen yóm khulung hedem lemwót béléem.

⁷ Hol kóhem dou salau anì balinge mólós. Hol denyohem ou anì laen dù bud usingu, balù udì.

⁸ Bud hulékem ebéléu dé yóm dou kligal. Lómó kegnómu du ni, lómón ke deng lenunahem ou, ne lómón ke denge mesfu. Bede tngónu gbekem bud hulék du ebéléu yóm kligalu.

⁹ Béem bud snolò ne yó kem salau. Gotu kóhem yóm kdéen sidek tonem béléu.

¹⁰ Ó Dwata, suem béléu yóm nawa laen dù belenen. Bud hnomihem dou kehedemu, ne blayem dou yóm là konol nawahu ebéléem.

¹¹ Béem hdó ou bè soluhem. Béem kó béléu yóm kóm Tulus.

¹² Hulékem ebéléu yóm kligal lemwót bè yóm tehe kehewaem dou. Hol benlayem ou óyô mimón kóm.

¹³ Ke yó se nmoem béléu, angat toloku yó kem kóm hlau bè yó kem tau gemsalà. Nénégem kà angat le semfulék ebéléem.

¹⁴ Ó Dwata yóm gel lemwà dou, hol hnifótem ou bè yóm tey litô deng hdanagu. Ke yó se nmou, hligale mutóm du bè sngal yóm kehlifótem salà.

¹⁵ Hol benlayem ou khulung mudél, Dwata, anì hol dóyónu uu.

¹⁶ Là kóen gsengel nawahem du ke olohu demsù ebéléem mò bayad salau. Senged se yóm dsù gel hkekeb me ebéléem, là kóen gsengel nawahem du.

¹⁷ Yó dé henged mò dsuu ebéléem, Dwata, duhen yóm hol keheglaanu béléem. Là kô nam e kenbê du yóm tau ke heglaanen knóen ne hegsel bè salaen.

¹⁸ Ó Dwata, hol tnóbóngem mi kem kóm tau bè kóm benwu bè Sayun. Bud hefdaem yóm beng hmilol Jirusalim.

¹⁹ Ke yó se kmoen, angat tey kehyu nawahem du ke wen gel dsù me ebéléem. Senged se yóm dsù gel hkekeb me, tey kehyu nawahem du. Ne angat wen kem safì tudu gel dsù me ebéléem snéen.